اباي وبلىسىنداعى ءورت: قاتتى ءتۇتىن ۇشقىشتاردىڭ جۇمىسىن قيىنداتىپ جاتىر

استانا. قازاقپارات - اباي وبلىسىندا ورمان ورتىمەن كۇرەس جۇمىستارى جالعاسىپ جاتىر دەپ حابارلايدى قازاقپارات.

قازىر ءورتتىڭ جالپى اۋماعى شامامەن - 60 مىڭ گ ا. الايدا ەلدى مەكەندەرگە قاۋىپ جوق. ەكولوگيا جانە تابيعي رەسۋرستار مينيسترلىگى ءورتتىڭ تارالۋىن شەكتەۋ ءۇشىن ءتيىستى شارالار جۇرگىزىلىپ جاتقانىن مالىمدەدى.

«13-ماۋسىم كۇنى تاڭعى ساعات 4-تەن باستاپ ءورتتىڭ شەتتەرىن ءسوندىرۋ ماقساتىندا ءتورت اۋە بورتىنىڭ ۇشۋى جۇزەگە اسىرىلدى. الايدا قاتتى ءتۇتىن ۇشقىشتاردىڭ جۇمىسىن قيىنداتۋدا. قازىرگى ۋاقىتتا ءورتتى سوندىرۋگە بارلىعى 1803 ادام، 348 بىرلىك ءتۇرلى تەحنيكا مەن 12 تىكۇشاق جۇمىلدىرىلعان»، - دەپ جازىلعان مينيسترلىك حابارلاماسىندا.

مەتەورولوگتاردىڭ حابارلاۋىنشا، 13-ماۋسىم كۇنى كەشكە وتكىنشى جاڭبىر جاۋىپ، نايزاعاي ويناۋى مۇمكىن. كۇندىز سولتۇستىك- شىعىستان جەل سوعۋى ىقتيمال.

ايتا كەتەيىك، بۇعان دەيىن اباي وبلىسىنىڭ اكىمى نۇرلان ۇرانحايەۆ جالىننىڭ ءالى دە باسىلا قويماعانىن، دەسە دە ورمان ورتىنەن جاقىن اۋماقتاعى اۋىلدارعا ءقاۋىپ جوق ەكەنىن ايتقان بولاتىن.

ەسكە سالايىق، 8-ماۋسىم كۇنى تۇتانعان «سەمەي» ورمانى رەزەرۆاتىنداعى ورتپەن كۇرەسكە جۇمىلدىرىلعان 14 ورمانشى قازا بولعان ەدى. اباي وبلىسى اكىمىنىڭ ورىنباسارى ديميتري گاريكوۆتىڭ ايتۋىنشا، ءورت 2 رەت تۇسكەن نايزاعايدان تۇتانعان.

پرەزيدەنت قاسىم- جومارت توقايەۆ جۇمىس ساپارىمەن اباي وبلىسىنا باردى.

12-ماۋسىم ەلىمىزدە ازا تۇتۋ كۇنى بولىپ جاريالاندى.