دجوردج سوروس ءوزىنىڭ بيزنەس يمپەرياسىن باسقارۋ ءىسىن ۇلىنا تاپسىردى

None
ۆاشينگتون. قازاقپارات - امەريكالىق ميللياردەر ءارى فيلانتروپ دجوردج سوروس 25 ميلليارد دوللارلىق بيزنەس يمپەرياسىن باسقارۋدى 37 جاستاعى ۇلى الەكسكە تاپسىردى، دەپ حابارلايدى قازاقپارات.

جەكسەنبى كۇنى Wall Street Journal گازەتىنە بەرگەن سۇحباتىندا 92 جاستاعى قارجىگەر ۇلىنىڭ بۇعان ابدەن لايىق ەكەنىن ايتتى.

الەكس سوروس - دجوردج سوروستىڭ بەس بالاسىنىڭ ءبىرى، ول نيۋ- يوركتە ءوسىپ، بەركليدەگى كاليفورنيا ۋنيۆەرسيتەتىندە تاريح عىلىمدارىنىڭ كانديداتى دارەجەسىن الدى.

وتكەن جىلدىڭ جەلتوقسان ايىندا ول سوروستىڭ باستى جوباسى - «اشىق قوعام» قورىن باسقاردى، سونىمەن قاتار امەريكالىق ساياسي پارتيالاردى قارجىلاندىرۋ جوبالارىن ۇيلەستىردى.

ەندى الەكس سوروس باسشىلىق ەتەتىن «اشىق قوعام» قورى بۇرىنعىداي باسپا ءسوز بوستاندىعىن قولداۋ، سوت تورەلىگى جۇيەسىن رەفورمالاۋ، بوسقىنداردىڭ قۇقىعىن قورعاۋ، ليبەرالدىق ساياساتكەرلەردى قولداۋ ءىسىن ارى قاراي جالعاستىرادى. ول ءۇشىن الەمنىڭ 120 ەلىندە جىلىنا ءبىر جارىم ميلليارد دوللارعا جۋىق قاراجات جۇمسالادى.

دجوردج سوروس - امەريكاندىق ترەيدەر، قارجىگەر، ينۆەستور جانە فيلانتروپ. سوروستىڭ قايراتكەرلىگى ءارتۇرلى مەملەكەتتەردە ءارتۇرلى رەاكسيا تۋعىزىپ ءجۇر.

ەكىنشى دۇنيەجۇزىلىك سوعىس كەزىندە نەمىس اسكەرلەرى ۆەنگرياعا باسا كوكتەپ كىرگەندە، ول 14 جاستا ەدى. سوروستار وتباسى ءتىرى قالعان ازداعان ەۆرەي جانۇيالارىنىڭ ءبىرى بولدى. 1947 -جىلى سوروس ۇلى بريتانياعا ەميگراتسياعا كەتىپ، وندا بەس جىلدان كەيىن لوندون ەكونوميكا مەكتەبىن (LSE) ءبىتىردى. ستۋدەنت بولىپ جۇرگەن جىلدارىندا ول كارل پوپپەردىڭ عىلىمي فيلوسوفيالىق ەڭبەكتەرىمەن تانىسىپ، بۇل عالىمنىڭ جۇمىستارى سوروستىڭ دۇنيەگە كوزقاراسىنا، سونداي اق بولاشاق كاسىبي جانە قايىرىمدىلىق قىزمەتىنە زور اسەرىن تيگىزدى.

1956 -جىلى سوروس امەريكا قۇراما شتاتتارىنا كوشىپ كەتىپ، وندا قارجى نارىقتارى تاريحىنداعى ەڭ تابىستى، كەڭىنەن تانىمال «كۆانتۋم گرۋپ» (Quantum Group) حالىقارالىق ينۆەستيتسيالىق قورىنىڭ نەگىزىن قالاپ، كوپ داۋلەت جينايدى. قازىرگى ۋاقىتتا ول «Quantum Group of Funds» حالىقارالىق ينۆەستيتسيالىق قورلار جەلىسىنىڭ باس كەڭەسشىسى بولىپ تابىلاتىن «Soros Fund Management LLC» - جەكە ينۆەستيتسيالىق كومپانياسىنىڭ پرەزيدەنتى ءارى باسقارما ءتوراعاسى. قارجى سالاسىندا فەنومەن دەۋگە تۇرارلىق تابىسقا جەتكەن سوروس ەندى اشىق قوعام قۇرۋعا باعىتتالعان وزگەشە ينۆەستيتسيالارمەن اينالىسۋعا بەت بۇردى. ءوزىنىڭ ايتۋى بويىنشا، وزىنە قانشا جۇمساسا دا تاۋسىلمايتىن مول اقشا تاپقان سوروس قايىرىمدىلىق قورلارىن قۇرا باستادى. ولاردىڭ مىندەتى - اشىق قوعام ينستيتۋتتارىن نىعايتۋعا جانە دامىتۋعا سەپتەسۋ. وسىنداي العاشقى اشىق قوعام قورى 1979-جىلى نيۋ- يوركتە اشىلدى. 1984 -جىلى بۋداپەشت قالاسىندا العاشقى شىعىس ەۋروپالىق قور ءوز جۇمىسىن باستادى.

«ءوزىم قاشىپ قۇتىلعان جابىق قوعامنىڭ جانە مەنىڭ ءومىر سۇرگىم كەلگەن اشىق قوعامنىڭ اراسىنداعى ايىرماشىلىقتار مەن ءۇشىن وتە قىزىق بولاتىن، - دەپ جازادى سوروس. - بايلىعىمنىڭ ارقاسىندا مەن وزىمە ماڭىزدى بولىپ كورىنەتىن ىستەردى جاساۋعا، دۇنيەنى بارىنشا جاقسى قۇرۋ تۋرالى ارمانىمدى ءىس جۇزىنە اسىرۋعا مۇمكىندىك الدىم». بۇل ارماندى ىسكە اسىرۋ سوروس ءۇشىن ءبىراز قىمباتقا ءتۇسىپ وتىر. 1994 -جىلى ول ءوزىنىڭ قايىرىمدىلىق قورلارىنا 300 ميلليون دوللار سالدى، ال ون جىلدان كەيىن، 2004 -جىلى بۇل سيفرلار 474 ميلليون دوللارعا تەڭ بولدى. دجوردج سوروس قارجىگەر جانە فيلانتروپ رەتىندە عانا ەمەس، الەۋمەتتىك ويشىل، ءبىرقاتار كىتاپتاردىڭ اۆتورى رەتىندە دە تانىمال، ونىڭ ەڭبەكتەرىنىڭ ىشىندە: «امەريكاندىق ارتىقشىلىقتىڭ»سابىن كوبىگى«(2004)، سونداي اق ەرتەرەكتە شىققان»دجوردج سوروس جاھاندانۋ تۋرالى«(2002)،»قارجى الحيمياسى«(1987)،»كەڭەستىك جۇيەنى اشا وتىرىپ «(1990)،» سوروس تۋرالى سوروس«(1995)،»الەمدىك كاپيتاليزمنىڭ داعدارىسى«(1998)،»جاھاندىق كاپيتاليزمنىڭ داعدارىسى: پروبلەماعا قايتىپ ورالۋ«(2000) .

ونىڭ ساياسي، ەكونوميكالىق جانە الەۋمەتتىك تاقىرىپتاعى ماقالالارى بۇكىل دۇنيە ءجۇزىنىڭ اسا ءىرى جۋرنالدارى مەن گازەتتەرىندە تۇراقتى تۇردە جاريالانىپ تۇرادى. ءوزى قىزمەت ەتىپ جۇرگەن ۋاقىتتىڭ ىشىندە دجوردج سوروس بىرنەشە دۇركىن ءار ءتۇرلى حالىقارالىق ماراپاتتار مەن اتاقتارعا يە بولدى. ولاردىڭ ىشىندە نيۋ- يوركتەگى جاڭا الەۋمەتتىك زەرتتەۋلەر مەكتەبىنىڭ، وكسفورد ۋنيۆەرسيتەتىنىڭ، يەل ۋنيۆەرسيتەتىنىڭ، بۋداپەشتتەگى ەكونوميكا ۋنيۆەرسيتەتىنىڭ، بولونيا ۋنيۆەرسيتەتىنىڭ، رەسەي فەدەراتسياسى سىرتقى ىستەر مينيسترلىگىنىڭ ماسكەۋ مەملەكەتتىك حالىقارالىق قاتىناستار ينستيتۋتىنىڭ قۇرمەتتى دوكتورى ديپلومدارى، ك. د. ۋشينسكي مەدالى، گۋمانيتارلىق عىلىمدار ينستيتۋتى (اۆستريا) مەن كەربەر قورى (گەرمانيا) قۇرعان حاننا ارەندت سىيلىعى، پۋشكيننىڭ مەرەيتويلىق التىن مەدالى.

اۆتور:

سماعۇلوۆا ەركەجان


سوڭعى جاڭالىقتار