وزبەكستان پرەزيدەنتى قازاقستان حالقىنا كوڭىل ايتتى

استانا. قازاقپارات - وزبەكستان تاراپىنىڭ باستاماسىمەن مەملەكەت باسشىسى قاسىم- جومارت توقايەۆ وزبەكستان پرەزيدەنتى شاۆكات ميرزيەۆپەن تەلەفون ارقىلى سويلەستى. قازاقپارات بۇل تۋرالى اقورداعا سىلتەمە جاساپ حابارلايدى.

وزبەكستان پرەزيدەنتى اباي وبلىسىنداعى ءورت سالدارىنان ادامداردىڭ قازا تابۋىنا بايلانىستى مەملەكەت باسشىسىنا جانە قازاقستان حالقىنا كوڭىل ايتتى. شاۆكات ميرزيەۆ مەرت بولعان ازاماتتاردىڭ وتباسىلارىنىڭ قايعىسىنا ورتاق ەكەنىن جەتكىزدى.

اڭگىمەلەسۋ بارىسىندا تاراپتار ەكى ەل اراسىنداعى ستراتەگيالىق سەرىكتەستىك پەن ىنتىماقتاستىقتى ودان ءارى نىعايتۋعا نيەتتى ەكەنىن تاعى دا راستادى جانە الەمدەگى قازىرگى جاعداي تۋرالى پىكىر الماستى.

بۇعان دەيىن سەمەي ورمانشىلارىنىڭ قازاسىنا تۇركيا ۇكىمەتى كوڭىل ايتقان بولاتىن.

ەسكە سالايىق، «سەمەي» ورمانى رەزەرۆاتىندا ءورت 8 -ماۋسىم كۇنى شىققان بولاتىن.

اباي وبلىسى اكىمىنىڭ ورىنباسارى ديميتري گاريكوۆتىڭ ايتۋىنشا، ءورت 2 رەت تۇسكەن نايزاعايدان تۇتانعان.

ءتىلسىز جاۋدى اۋىزدىقتاۋعا جۇمىلدىرىلعان 14 ورمانشى قازا بولدى. بارلىعى مەملەكەتتىك ناگراداعا ۇسىنىلدى.

سەمەي ورمانىنداعى ءورت فاكتىسى بويىنشا قىلمىستىق ءىس قوزعالدى.

ءۇش اۋىلدىڭ تۇرعىندارى قاۋىپسىز جەرگە ەۆاكۋاتسيالاندى.

10- ماۋسىم كۇنى تۇستە جالىن شارپىعان اۋماق 60 مىڭ گەكتاردان اسىپ كەتكەنى حابارلاندى.

12 -ماۋسىم سەمەي ورمانىنداعى الاپات ورتتەن قازا بولعانداردى ازا تۇتۋ كۇنى بولىپ جاريالاندى.

بۇگىن اباي وبلىسىنىڭ پوليتسياسى تراكتورىمەن ءورت سوندىرۋگە كەتكەن تاعى ءبىر ادامنىڭ ىزدەستىرىلىپ جاتقانىن حابارلادى.