سەمەيدەگى ورمان ورتىنەن تاعى ءبىر اۋىل تۇرعىندارى كوشىرىلدى

استانا. قازاقپارات - اباي وبلىسىنداعى ورمان ءورتى قاۋپىنەن وزەرسكوگو اۋىلىنىڭ تۇرعىندارى سەمەي قالاسىنا ەۆاكۋتسيالاندى، دەپ حابارلايدى قازاقپارات ءتىلشىسى وبلىس اكىمدىگىنە سىلتەمە جاساپ.

«ورمان القابىنا جاقىن ورنالاسقان وزەرسكوگو اۋىلدىق وكرۋگى تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا ولاردى سەمەي قالاسىنا ەۆاكۋاتسيالاۋ تۋرالى شەشىم قابىلداندى. اۋىل تۇرعىندارى الدىن الا ۇيىمداستىرىلعان ەۆاكۋاتسيالىق پۋنكتتەرگە ورنالاستىرىلدى. ىستىق تاماق جانە ءبىرىنشى كەزەكتە قاجەتتى قۇرالدارمەن قامتاماسىز ەتىلگەن. اۋىلداعى ۇيلەر مەن جەكە قوسالقى شارۋاشىلىقتارىن پوليتسيا قىزمەتكەرلەرى كۇزەتەدى»، - دەلىنگەن شۇعىل حابارلامادا.

اقپاراتتا ايتىلعانداي، وزەرسكوگو اۋىلىنىڭ كىرە بەرىسىنە بەكەتتەر قويىلدى.

بۇعان دەيىن ءوڭىر اكىمدىگى الاپات ورتكە بايلانىستى بۇلاق اۋىلىنىڭ تۇرعىندارى سەمەيگە كوشىرىلگەنىن حابارلاعان ەدى.

ايتا كەتەيىك، وڭىردە قۇرىلعان جەدەل شتابتىڭ جەتەكشىسى دميتري گاريكوۆ ورمان ءورتى نەگىزىنەن تۇندە ءسوندىرىلىپ جاتقانىن ايتقان ەدى.

اۆتور:

داۋلەت ىزتىلەۋ