توقايەۆ ياساۋي كەسەنەسىنە ساپارلاعان يۋنەسكو- نىڭ باس ديرەكتورىنا العىس ءبىلدىردى

None
استانا. قازاقپارات - پرەزيدەنت قاسىم- جومارت توقايەۆ يۋنەسكو- نىڭ باس ديرەكتورى ودرە ازۋلەنى قابىلدادى. قازاقپارات بۇل تۋرالى اقورداعا سىلتەمە جاساپ حابارلايدى.

كەزدەسۋ بارىسىندا قازاقستان مەن يۋنەسكو اراسىنداعى مادەني جانە تاريحي مۇرالاردى ساقتاۋ، ءبىلىم جانە عىلىم سالاسىنداعى حالىقارالىق بايلانىستاردى كەڭەيتۋ ىسىندەگى ىنتىماقتاستىقتىڭ وزەكتى ماسەلەلەرى تالقىلاندى.

پرەزيدەنت قاسىم- جومارت توقايەۆ ودرە ازۋلەگە ءىلتيپات بىلدىرە وتىرىپ، ونىڭ يۋنەسكو باس ديرەكتورى رەتىندەگى كوشباسشىلىعىن جوعارى باعالايتىنىن، سونداي- اق ۇيىمدى ودان ءارى نىعايتۋعا باعىتتالعان قىزمەتىنە قولداۋ كورسەتەتىنىن اتاپ ءوتتى.

پرەزيدەنت باس ديرەكتورعا قوجا احمەت ياساۋي كەسەنەسىنە بارعانى ءۇشىن العىس ءبىلدىردى. سونداي- اق ونىڭ تۇركىستانعا ساپارىن ازاماتتارىمىز وڭ قابىلداعانىن جانە بۇقارالىق اقپارات قۇرالدارىندا كەڭىنەن جاريالانعانىن جەتكىزدى.

«ءسىزدىڭ ساپارىڭىز قازاقستان مەن يۋنەسكو اراسىنداعى ءوزارا ءتيىمدى ىنتىماقتاستىقتى ودان ءارى دامىتۋ ءۇشىن اسا ماڭىزدى. يۋنەسكو ءبىز ءۇشىن ەرەكشە ۇيىم ءارى باسىمدىققا يە. ءبىز وسى ءوزارا قارىم- قاتىناستى ودان ءارى دامىتۋ ءۇشىن بار كۇش- جىگەرىمىزدى جۇمسايمىز»، - دەدى پرەزيدەنت.

مەملەكەت باسشىسى كليمات، بيوالۋانتۇرلىلىك جانە سۋ رەسۋرستارى سالالارىنداعى بىرلەسكەن جوبالاردى ىسكە اسىرۋعا قازاقستان نيەتتى ەكەنىن جەتكىزدى. جاقىن ارادا وڭىرلىك كوپسالالى كەڭسە بولىپ قايتا قۇرىلاتىن الماتى قالاسىنداعى يۋنەسكو بيۋروسىنىڭ قىزمەتى - قازاقستاننىڭ وسى ۇيىممەن تابىستى بايلانىسىنىڭ جارقىن مىسالى.


سوڭعى جاڭالىقتار