قازاقستاننان قىتايعا يادرولىق وتىننىڭ ەكىنشى پارتياسى جىبەرىلدى

استانا. قازاقپارات- وسكەمەندە ىسكە قوسىلعان ءوندىرىس كەشەنىنىڭ ارقاسىندا اتوم رەاكتورىنا ارنالعان جىلۋ بولگىش قۇرامالار ەكسپورتىنىڭ قارقىنى ۇلعايدى.

كاسىپورىن كورشى ەلدىڭ سۇرانىسىن قامتۋعا قاۋقارلى. بيىل جىلۋ بولگىش قۇرامالار تۇرىندە 200 توننا ۋران وندىرىلسە، الداعى جىلدارى بۇل كورسەتكىشتى ەكى ەسە ارتتىرۋ كوزدەلگەن. ويتكەنى ءبىزدىڭ ءونىمدى تۇتىناتىن قىتايدا 2025 -جىلعا دەيىن اتوم رەاكتورلارىنىڭ قۋاتى ارتا تۇسەدى. وندا جىل سايىن شامامەن 6-8 ەنەرگوبلوك سالىنادى. ال ءدال قازىر 54 ستانسيا جۇمىس ىستەپ تۇر.

ۆلاديمير ۆاحنەنكو، ءۇلبى مەتاللۋرگيالىق زاۋىتىنىڭ باس ينجەنەرى:

- بۇگىنگى كۇنى جىلۋ بولگىش قۇرامالاردى ءوندىرۋ زاۋىتىنىڭ قاۋقارىن ارتتىرۋعا تەحنولوگيالىق مۇمكىندىك جەتكىلىكتى. ياعني قىتاي ەلىنە ەكسپورتتى ەكى ەسە ارتتىرۋعا بولادى. ەلىمىزدىڭ اتوم ەنەرگەتيكاسى سالاسىن دامىتۋعا دا اتسالىسا الامىز.

www.24.kz