ومار ابدەل سالام: بەيبارىس سۇلتاننىڭ سوعىستا قولداناتىن ەرەكشە ادىستەرىن ءالى دە زەرتتەۋ كەرەك
تاياۋ شىعىس ەلىنىڭ تاريحشىسى جالپى يسلام وركەنيەتى، يسلام تاريحى تۋرالى 150-گە تارتا كىتاپ جازعان.
«ەڭبەكتەرىمنىڭ نەگىزگى تاقىرىبى يسلام الەمى جايلى. سونىڭ ىشىندە اپات الدىندا تۇرعان كۇللى مۇسىلمان الەمىن كۇيرەۋدەن قۇتقارعان ماملۇكتەر جايلى دا زەرتتەۋلەرىم بار. جالپى ماملۇكتەر يسلام ءدىنىنىڭ دامۋىنا تىڭ سەرپىن بەرسە، ونداعى نەگىزگى جەتىستىك سۇلتان بەيبارىس تۇسىندا بولدى دەپ ايتۋعا بولادى. سونداي كىتاپتىڭ بىرىندە سۇلتان بەيبارىستىڭ تاياۋ- شىعىستاعى ارەكەتتەرى مەن يسلام الەمىندە ورنى تۋرالى باياندالادى. سۇلتان بەيبارىس بۇگىن قايتا اشىلىپ جاتقان ءاز- زاحير مەشىتىن سالۋعا ىقپال ەتكەن كۇللى يسلام وركەنيەتىندەگى ءىرى تۇلعا. ونىڭ، جالپى ماملۇكتەردىڭ ليۆان جەرىندە قالعان، ساقتالعان مۇراسى مول. سۇلتاننىڭ بۇكىل ارەكەتى مۇسىلمان ەلدەرىن كرەسشىلەر مەن باسقا دا باسقىنشىلاردان قورعاپ، يسلام ءدىنىن وركەندەتۋگە باعىتتالعان»، - دەدى عالىم جۋرناليستەرگە بەرگەن سۇحباتىندا.
ونىڭ ايتۋىنشا، مىسىر بيلەۋشىسى باسقىنشىلارعا قارسى سوعىستا ەرەكشە تاكتيكا قولدانىپ وتىرعان. ءتىپتى بەيبارىس سۇلتاننىڭ باسقىنشىلارمەن بەتپە- بەت سوعىسقا تۇسپەي، جاۋدىڭ وسال تۇسىن ءدال تاۋىپ، سوققى جاسايتىن ەرەكشە ادىستەرى بولعان.
«سۇلتان بەيبارىس مىسىرداعى جاسىرىن جولداردى جاقسى بىلگەن. ماسەلەن، مىسىر جەرىن كرەستشىلەردەن ازات ەتكەندە سول جاسىرىن جولداردى پايدالانعان. ولاردىڭ بەكىنىستەرىن بۇزىپ كىرىپ، تىكەلەي شابۋىلعا كوشكەننەن گورى جەرگىلىكتى جەردىڭ ىڭعايىنا جۇگىنگەن. ول بىرنەشە شايقاستى سولاي جەڭگەن بولاتىن. وسى ءادىس ايلالارىنىڭ ءبارىن زەرتتەۋ كەرەك»، - دەدى ومار ابدەل سالام.
اۆتور:
قانات مامەتقازى ۇلى