تۇركىستاندا سۇلتانبەك قوجانوۆتىڭ قىشقا قاشالىپ جازىلعان قولتاڭباسى بار
تۇركىستان وبلىسىندا الاشتىڭ ارىسى سۇلتانبەك قوجانوۆ جايىندا ءبىرشاما قۇندى جادىگەرلەر بار. ماسەلەن، سوزاق اۋدانىنداعى سۇلتانبەك قوجانوۆ اتىنداعى مۇراجايدا ІҮ وزبەك كەڭەس سەزىنە قاتىسۋ الدىندا ءوز قولىمەن تولتىرعان انەكەتاسى ساقتاۋلى تۇر. ودان بولەك، ءوزى قول قويعان حاتتامالار مەن وزگە دە قۇجاتتاردىڭ كوشىرمەلەرىمەن تانىسۋعا بولادى. قىزمەت بابىندا تۇسكەن سيرەك سۋرەتتەردى دە مۋزەي قورىنان كەزدەستىرە الاسىز.
ال، تۇركىستان قالاسىنداعى ساتتار ەرۋبايەۆ مۋزەيىندەگى عيماراتتا قىشقا قاشالىپ جازىلعان «ح. سۋ...ن» دەگەن جازۋ ساقتالعان. جەرگىلىكتى تۇرعىندار بۇل 1910-جىلى اتالعان مەكتەپتە ءبىلىم العان سۇلتانبەك قوجانوۆتىڭ قولتاڭباسى دەپ بىلەدى.
«ادامنىڭ قولتاڭباسىن زەرتتەيتىن كريپتوگرافيا دەيتىن عىلىم بار. مۇنىڭ انىق-قانىعىن راسىمدەپ بەرۋدى سول مامانداردىڭ ەنشىسىنە قالدىرايىق تا، كىشكەنتاي بولسا دا، وسى ءبىر جادىگەرىمىزدى سۇلتانبەكتىڭ كوزىندەي كورىپ، كەلەر ۇرپاققا امانات ەتىپ ايتىپ جۇرەيىك»، - دەيدى عالىم بەكجىگىت سەردالى.
بۇل قولتاڭبانى ق ر مادەنيەت قايراتكەرى، تۇركىستان قالاسىنىڭ قۇرمەتتى ازاماتى نۇرماحان نازاروۆ تاۋىپتى. نىساننىڭ سىرتىنا تازارتۋ جۇمىستارى ءجۇرىپ جاتقان ساتتە كورىپ قالعان. سودان ب ا ق ارقىلى ماقالالار جازىپ، قۇندى دۇنيەمەن كوپشىلىكتى تانىستىرعان.
جالپى بۇل عيمارات 1904-جىلدارى كۇيدىرىلگەن كىرپىشتەن سالىنعان. سودان 1989-جىلعا دەيىن 3- سىنىپتىق ورىس تۇزەم مەكتەبى رەتىندە جۇمىس ىستەگەن. مۇندا قوعام قايراتكەرلەرى سۇلتانبەك قوجانوۆ پەن ساتتار ەرۋبايەۆ ءبىلىم العان. كەيىننەن ساتتار ەرۋبايەۆ مەموريالدىق مۋزەيى بولىپ اشىلدى. ال، 1995-جىلى ادەبي-مادەني مۇراجاي مارتەبەسىنە يە بولدى. مۇندا ساتتار ەرۋبايەۆ پەن قاتار جەرگىلىكتى قالامگەرلەردىڭ ادەبي مۇرالارى جيناقتالعان.
