قازاقستاندا بىلىكتى ۇشقىش جەتىسپەيدى
ساراپشىلاردىڭ ايتۋىنشا، قازاقستاندا قابىلەتتى ۇشقىشتار قات. سوندىقتان وتاندىق اۋە كومپانيالارى ولاردى امالسىز شەتەلدەن شاقىرىپ ءجۇر. العاشقى 4 ايدا وتاندىق اۋە كومپانيالارى 4 ميلليوننان اسا جولاۋشى تاسىدى. ودان بولەك بىلتىر ەلدە 410 مىڭ ۇشاققا قىزمەت كورسەتىلدى. بۇل 2021 -جىلمەن سالىستىرعاندا % 90- عا ارتىق. رەسمي ستاتيستيكا اۋەدەگى قوزعالىستىڭ قارقىندى ءوسىپ جاتقانىن كورسەتەدى. الايدا نارىقتاعى سۇرانىستى بىلىكتى وتاندىق ماماندارمەن قامتاماسىز ەتە الماي وتىرمىز. قازىر ازاماتتىق اۆياتسيا اكادەمياسىندا 1400 ادام وقيدى. جىلىنا 400 تۇلەك بىتىرەدى. ونىڭ 40 ۇشقىش. ءبىراق بۇل جەتكىلىكسىز. ونىڭ ۇستىنە تۇلەكتەردىڭ بىلىكتىلىگىنە دە سۇراق كوپ.
بەكەن سەيداحمەتوۆ، ازاماتتىق اۆياتسيا اكادەمياسىنىڭ رەكتورى:
- ۇشقىشتار سالاسىندا كەلسەك، كىشكەنە ماسەلەلەر بار. ويتكەنى ەير استانادا ەۋرووداقتىڭ دارەجەسىندەگى تالاپ بار. ءبىز وعان جەتكەن جوقپىز. وعان دايىنداپ جاتىرمىز. ەندى ەۋروپا وداعىنىڭ تالابىنا ساي كەلەدى دەپ جاتىرمىز. ءبىراق سەرتيفيكاتىمىزدى ءالى العان جوقپىز. ءبىزدىڭ ستراتەگيامىز بويىنشا 2025 -جىلى ەۋروپا وداعىنىڭ سەرتيفيكاتىن الۋىمىز كەرەك. ەلدە ۇشقىشتاردى دايىندايتىن جالعىز اكادەميا وسى.
قازىر مۇنداعىلار الەمدەگى ۇزدىك وقۋ ورىندارىنا بەرىلەتىن ەۋروپالىق سەرتيفيكاتتى الۋعا دايىندالىپ جاتىر. ءبىراق اكادەميا ءالى دە تەحنيكالىق جابدىققا ءزارۋ. ءبىلىم ورداسىنا ۇشاقتان باستاپ، جوعارعى ستاندارتتارعا ساي زاماناۋي قۇرىلعىلار قاجەت.
داۋلەت تورەاحمەتوۆ، ازاماتتىق اۆياتسيا اكادەمياسىنىڭ ۇشۋ جاتتىعۋ، ۇشقىشتاردى دايىنداۋ، ۇشۋ ورتالىعىنىڭ ديرەكتورى:
- جەتىسپەيتىن تىكۇشاقتار بار. 2015 -جىلدان باستاپ تىكۇشاقتاردى دايىنداۋ ءجۇرىپ جاتىر. تىكۇشاق جوق بولعانان كەيىن جالعا الامىز. ۇشاقتاردىڭ دا جەتىسپەۋشىلىگى بار. ءوزىمىزدىڭ ۇشاقتار بار، ءبىراق ۇشقىشتاردىڭ كوپتىگىنەن ءبىز ۇشاقتاردى ارەنداعا الۋعا ءماجبۇرمىز. اكادەمياداعى وقىتۋشىلار مەن نۇسقاۋشىلاردىڭ دا بىلىكتىلىگىن ارتتىرۋ كەرەك. قازىر ءبىرقاتارى ەۋروپادا وقىپ جاتىر.
مامان تاپشىلىعىن شەشۋگە اۋە كومپانيالارىنىڭ وزدەرى دە اتسالىسۋدا. سونىڭ ءبىرى - ەير استانا كومپانياسى. ولار ازاماتتاردى تولىق وقىتىپ، جۇمىسقا قابىلداپ جاتىر.
ءىلياس يسابايەۆ، اۋە كومپانياسىنىڭ مەنەدجەرى:
- قازىر الەمدەگى الپاۋىت كومپانيالارىنىڭ باسىم بولىگىندە مامان تاپشى. تيىسىنشە، بىزدە دە دەفيتسيت بار. ۇشقىشتاردىڭ جەتكىلىكتى بولعانىمەن، الدا جاڭا اۋە كەمەلەرى قوسىلادى. سوندىقتان شەتەلدەگى بىلىكتى مامانداردىڭ كومەگىنە جۇگىنەمىز. وتاندىق مامانداردى دايارلاۋعا دا اتسالىسىپ جاتىرمىز. ءبىزدىڭ ارنايى باعدارلامامىز ارقىلى وقىپ، قازىر جۇمىس ىستەپ جۇرگەن قىزمەتكەرلەرىمىز بار.
سالا ماماندارىنىڭ پىكىرىنشە، ماسەلەنى شەشۋ ءۇشىن ءبىلىم بەرۋ ىسىنە ينۆەستيتسيا تارتۋ كەرەك. سوندا كاسىبي ۇشقىشتار عانا ەمەس، تەحنيكالىق مامانداردى دا كوبەيتۋگە مۇمكىندىك بولادى. كاتالين رادۋ، قازاقستاننىڭ اۆياتسيالىق اكىمشىلىگىنىڭ باس ديرەكتورى:
- الەمدە اۋە قاتىناسىنا سۇرانىس ارتىپ جاتىر. تيىسىنشە مامان تاپشىلىعىمەن جاھانداعى كەز كەلگەن اۋە كومپانياسى كەزىگىپ وتىر. ءبىز ءبىلىم بەرۋ جۇيەسىنە ينۆەستيتسيا تارتۋدى جەدەلدەتۋىمىز كەرەك. كەي اۋە كومپانيالارى ۇشقىشتاردى وزدەرى وقىتادى. بۇل تاجىريبەگە دە ءمان بەرگەن ءجون. سالانى سەرپىلتۋگە مەملەكەتتىڭ قولداۋى دا ارتىق ەتپەيدى.
قازىر ەلدەگى اۆياتسيا سالاسىندا 20 مىڭ ادام جۇمىس ىستەيدى. جىلدان جىلعا مامان تاپشىلىعى ءوسىپ جاتىر. ءبىراق ناقتى قاي ماماندىققا ادام كەرەك، قاي باعىتتا تاپشىلىق كوپ ەكەنى زەرتتەلمەيدى. ازاماتتىق اۆياتسيا وكىلدەرى قولدا ناقتى ستاتيستيكا بولسا، سول باعىتقا باسىمدىق بەرەر ەدىك دەيدى.
www.24.kz
