قازاقستان بىتىمگەرلەرى قازىر قاي ەلدەردە ميسسيالارىن اتقارىپ ءجۇر
بۇل تۋرالى قازاقپارات قورعانىس مينيسترلىگىنە سىلتەمە جاساپ حابارلايدى.
29- مامىر – ب ۇ ۇ حالىقارالىق بىتىمگەرلەر كۇنى. بۇل كۇن 1948-جىلى «بىرىككەن ۇلتتار ۇيىمىنىڭ بىتىمگەرلىك شارتتارىنىڭ ورىندالۋىن باقىلاۋ ورگانى» دەپ اتالاتىن بىتىمگەرلىك وپەراتسياسىنىڭ باستالۋىنا سايكەس كەلەدى. ءدال وسى كۇنى 2002-جىلى رەسمي تۇردە ب ۇ ۇ- نىڭ باس اسسامبلەياسى قۇرىلدى.
قازاقستان س ءى م- دە ب ۇ ۇ- نىڭ العاشقى بىتىمگەرلىك ميسسياسىنىڭ قۇرىلعانىنا 75 جىل تولۋىنا وراي ق ر قورعانىس مينيسترلىگى وكىلدەرىنىڭ، بۇۇ ەلىمىزدەگى وكىلدىگىنىڭ جانە شەتەلدىك ديپلوماتيالىق كورپۋستىڭ قاتىسۋىمەن شارا ءوتتى. وندا ۇيىمنىڭ ميسسيالارى اياسىندا وتاندىق بىتىمگەرلەردىڭ قىزمەتىنە جوعارى باعا بەرىلدى.
2000-جىلى «قازاقستان بىتىمگەرلەر باتالونى» مەملەكەتتىك مەكەمەسى تۋرالى ەرەجەنى بەكىتۋ تۋرالى ۇكىمەت قاۋلىسى قابىلدانعان. سول جىلى قازاقستان ناتونىڭ «بەيبىتشىلىك جولىنداعى سەرىكتەستىك» باعدارلاماسى بويىنشا بىتىمگەرلىك قىزمەتىن باستادى.
2003-جىلدىڭ تامىزىندا يراكقا 27 ادامنان تۇراتىن «قازباتتىڭ» العاشقى ينجەنەرلىك-ساپەرلىك جاساعى باردى. بەس جىل ىشىندە قازاقستاندىق بىتىمگەرلەر 4 ميلليوننان استام وق-ءدارى مەن جارىلعىش قۇرىلعىلاردى زالالسىزداندىردى. وسى ۋاقىت ىشىندە ولار جەرگىلىكتى حالىقتى اۋىز سۋمەن قامتاماسىز ەتىپ، مۇقتاج جاندارعا مەديتسينالىق كومەك كورسەتتى.
2014-جىلدان باستاپ ب ۇ ۇ- نىڭ كوت-د' يۆۋار، باتىس ساحارا، ليۆان، ورتالىق افريكا رەسپۋبليكاسى جانە ماليدەگى ميسسيالارىنا شتاب وفيتسەرلەرى مەن اسكەري باقىلاۋشىلار رەتىندە 60 قا جۋىق قازاقستاندىق اسكەري قىزمەتشى، ونىڭ ىشىندە 6 ايەل قاتىستى.
ەلىمىزدىڭ بىتىمگەرشىلىك الەۋەتىن نىعايتۋداعى ماڭىزدى قادام 2018-جىلى ب ۇ ۇ مانداتى نەگىزىندە ارەكەت ەتكەن العاشقى قازاقستاندىق روتانى ليۆانعا جىبەرۋ بولدى. بەس جىل ىشىندە ۇلتتىق بىتىمگەرلىك كونتينگەنتىنىڭ جەكە قۇرامى 8 مارتە روتاتسيالاندى.
قازىرگى ۋاقىتتا ليۆاندا - 9، باتىس ساحارادا – 6، ماليدە جانە ورتالىق افريكا رەسپۋبليكاسىندا 2 قازاقستاندىق اسكەري قىزمەتشى ميسسياسىن وتكەرۋدە.
بىتىمگەرلەردى دايارلاۋ قورعانىس مينيسترلىگىنىڭ بىتىمگەرلىك وپەراتسيالار ورتالىعىنىڭ بازاسىندا جۇزەگە اسىرىلادى.