تۇركى حالىقتارى ءبىر- بىرىنە ۇقساس الىپبيلەر قابىلداۋ باستاماسىن كوتەردى

None
استانا. قازاقپارات - استانادا تۇركى الەمىنىڭ ورتاق ءالىپبيى جونىندەگى كوميسسيانىڭ ءبىرىنشى وتىرىسى ءوتىپ جاتىر. كوميسسيانىڭ مىندەتى - لاتىن الىپبيىنە كوشۋ كەزىندە ۇسىنىستار پاكەتىن ازىرلەۋ، دەپ حابارلايدى قازاقپارات ءتىلشىسى.

«جاڭا الىپبيگە كوشۋ ءارقاشان مەملەكەتتىڭ ىشكى ءىسى سانالادى. ءاربىر مەملەكەت بۇل ماسەلەنى ءوزى شەشەدى. ءبىزدىڭ مىندەتىمىز - ۇسىنىستار پاكەتىن ازىرلەۋ. ەگەر تۇركى مەملەكەتتەرىنىڭ كەز- كەلگەنى وسىنداي شەشىم قابىلداسا، وندا بۇل ۇسىنىستاردى ءالىپبيدىڭ ەڭ وڭتايلى، ۇتىمدى نۇسقاسىن تاڭداۋ ءۇشىن پايدالانۋعا بولادى. ارينە، ءار مەملەكەت قانداي الفاۆيتتى جانە قانداي فورمادا قابىلداۋ كەرەكتىگىن ءوز بەتىنشە شەشەدى. ءبىراق ەگەر بارلىق مەملەكەتتەر لاتىن الىپبيىنە كوشەتىن بولسا، وندا الىپبيلەردىڭ بارىنشا ءبىر- بىرىنە جاقىن، ءتۇرلى تۇركى حالىقتارىنىڭ وكىلدەرى ءۇشىن ءوزارا تۇسىنىكتى بولعانىن قالايمىز»، - دەدى تۇركى اكادەمياسىنىڭ پرەزيدەنتى شاين مۇستافايەۆ.

ول بىرنەشە عاسىرلار بويى تۇركى حالىقتارى اراب ءالىپبيىن قولدانعانىن مىسالعا كەلتىردى. ونىڭ پايمىنشا، بۇل بارلىعى ءۇشىن تۇسىنىكتى بولدى. وسىلايشا، زيالى قاۋىم وكىلدەرى ءالىپبيدىڭ ورتاق ۇقساستىعى ارقاسىندا ءتۇرلى تۇركى مەملەكەتتەرىندە جارىق كورگەن كىتاپتاردى، ەڭبەكتەردى ەركىن وقي الدى.

«بۇگىندە الفاۆيتتەر ءبىر- بىرىنەن ايتارلىقتاي ەرەكشەلەنەتىن بولسا، وندا ءبىزدىڭ حالىقتارىمىز وزگەنىڭ ادەبيەتىن، باسپا ءسوز حابارلامالارىن، جالپى جازبا مادەنيەتىن ءتۇسىنۋى وتە قيىن بولادى. ەگەر بۇل الىپبيلەر ۇقساس بولسا، وندا بايلانىس جاقىنداپ، اراقاتىناس ەركىن بولماق. بۇل ءبىزدىڭ حالىقتارىمىزدىڭ مادەني جاقىنداسۋىنا جانە بۇكىل تۇركى الەمىنىڭ مادەني ينتەگراتسياسىنا مۇمكىندىك بەرەدى»، - دەپ ءمالىم ەتتى شاين مۇستافايەۆ.

ول تۇركى حالىقتارىنىڭ ءالىپبيىن لاتىنعا كوشىرۋ ماسەلەسى ⅩⅨ عاسىردىڭ اياعى مەن ⅩⅩ عاسىردىڭ باسىندا كوتەرىلگەنىن ەسكە سالدى. 1926 -جىلى باكۋدە وتكەن العاشقى تۇركولوگيالىق سەزدە تۇركى حالىقتارىنىڭ لاتىن الىپبيىنە كوشۋى تۋرالى شەشىم قابىلداندى. 1939-1940 -جىلدارعا دەيىن بۇرىنعى كەڭەس وداعىنىڭ بارلىق مۇسىلمان حالىقتارى لاتىن ءالىپبيىن قولداندى. الايدا، كەيىن ول ەرىكتى شەشىممەن كيريلليتساعا اۋىستىرىلدى.