لوندوندا اباي- بەرنس قاۋىمداستىعى قۇرىلدى

لوندون. قازاقپارات - لوندوندا حاكىم اباي مەن شوتلانديانىڭ اتاقتى اقىنى روبەرت بەرنس اتىنداعى قاۋىمداستىقتىڭ تۇساۋى كەسىلدى.

قوس ەلدىڭ ۇلى تۇلعالارىنىڭ ولەڭدەرى وقىلىپ، اندەرى شىرقالدى، دەپ حابارلايدى قازاقپارات ءتىلشىسى.

قوناقتاردى شوتلاندتاردىڭ ۇلتتىق مۋزىكالىق اسپابى ۆولىنكادا حالىق ءانى «قاماجايدى» ورىنداعان جارتىلاي اعىلشىن، جارتىلاي شوتلاند مەتتيۋ ماكرەي كۇتىپ الدى. ادەتتە ۆولىنكانى شوتلانديامەن بايلانىستىرادى. ءبىراق انىعىندا وعان ۇقساس اسپاپ قازاق حالقىندا دا بار - جەلبۋاز دەپ اتالادى. سوندىقتان دا بولار، حالىق ءانىن ورىنداۋ ونەرپازعا قيىنعا سوقپادى.

روبەرت بەرنس - شوتلاند اقىنى، فولكلورشى، كوپتەگەن پوەمالار مەن ولەڭدەردىڭ اۆتورى. ونىڭ پوەزياسىنا يرونيا، ساركازم جانە ليريزم ءتان.

ولەڭدەرىن قۋاندىق شاڭعىتبايەۆ جانە وتەجان نۇرعاليەۆ سىندى بىرنەشە قازاق اقىنى ءتارجىمالاعان. بەرنس اباي قۇنانباي ۇلىنان جارتى عاسىر بۇرىن دۇنيەگە كەلگەن، ءبىراق شىعارماشىلىقتارىنا ءتان ورتاق تاقىرىپتار كوپ.

«اباي مەن بەرنستىڭ پوەزياسى وتە ۇقساس. وسى شاراعا كەلەر الدىندا مەن ابايدىڭ شىعارمالارىمەن تانىستىم. ەكەۋى دە وتە سەزىمتال اقىندار. ماحاببات، سۇلۋلىق، تابيعات تۋرالى جازعان ولەڭدەرىنە ءتانتىمىن. ۇلى تۇلعالاردىڭ ءارۋاعى قاۋىمداستىقتىڭ قۇرىلعانىنا قۋانىپ، ءبىر اۋناپ جاتقان شىعار»، - دەيدى اباي- بەرنس قاۋىمداستىعىنىڭ مۇشەسى ۋيليام پەيتي.

قاۋىمداستىقتىڭ تۇساۋكەسەرى پوەزيا كەشىنە ۇلاسىپ، ۇلى تۇلعالاردىڭ شىعارمالارى قازاق جانە اعىلشىن تىلدەرىندە وقىلدى. ديماش قۇدايبەرگەننىڭ جانكۇيەرلەرى سۇيىكتى ءانشىسىنىڭ رەپەرتۋارىنداعى «كوزىمنىڭ قاراسى»، «جەلسىز تۇندە جارىق اي» ولەڭدەرىنىڭ مازمۇنىن شەبەر جەتكىزە ءبىلدى.

«ابايدىڭ ولەڭدەرى وتە اۋەزدى كەلەدى. سان- الۋان ەموتسيالارعا بولەيدى. وقىعان كەزدە ءان تىڭداپ وتىرعانداي اسەردە بولاسىڭ. وسىدان كەيىن قازاق پوەزياسىن وقي بەرگىڭ كەلەدى، ەلگە ساياحاتتاۋعا ىنتالاندىرادى»، - دەيدى قاۋىمداستىق مۇشەسى سەباستيان دانن.

اباي- بەرنس قاۋىمداستىعىنىڭ باستى ماقساتى ەكى ەل اراسىنداعى مادەني جانە رۋحاني بايلانىستاردى نىعايتىپ، جان- جاقتى دامۋىنا اتسالىسۋ، ۇلى اقىنداردىڭ شىعارماشىلىعىن ۇلىقتاۋ. ۇيىمعا ازىرگە 50 دەن استام ديپلوماتيا، ءبىلىم جانە بيزنەس وكىلدەرى مۇشە. بولاشاقتا ولاردىڭ سانىن ارتتىرۋ جوسپارلانىپ وتىر.

«مەن قازاقستانمەن سوڭعى 7 جىلدان بەرى ىسكەرلىك بايلانىس ورناتىپ كەلەمىن. مادەنيەتى عاجاپ، ويتكەنى حالقى عاجاپ! سول تۋرالى كورگەن- بىلگەنىمدى ۇلىبريتانيا حالقىنا جەتكىزگىم كەلەدى. تۇماندى البيون دا مادەنيەتكە باي. شوتلانديانىڭ باعا جەتپەس قۇندى دۇنيەلەرى دە ەرەكشە. مادەني الماسۋدى نىعايتۋ - باستى مىندەتىمىز»، - دەيدى اباي- بەرنس قاۋىمداستىعىنىڭ نەگىزىن قالاۋشى افزال امين.

قاۋىمداستىققا قازاقستانمەن بيزنەس جاسايتىن ورتانىڭ وكىلدەرى دەمەۋشىلىك ەتەدى. ۇيىمداستىرۋشىلار جىلىنا كەمىندە ەكى باسقوسۋ وتكىزۋدى جوسپارلاپ وتىر - استانادا جانە لوندوندا. سونىمەن قاتار شارالارعا شاعىن قالالاردى دا تارتۋ مەجەلەنىپ وتىر.