الماتىدا قاي ورىنداردا سۋعا شومىلۋعا بولمايدى

الماتى. قازاقپارات - الماتى قالالىق ت ج د- نىڭ ازاماتتىق قورعانىس باسقارماسىنىڭ باستىعى ءانۋار يۋسۋپوۆ وڭىرلىك كوممۋنيكاتسيالار قىزمەتى بريفينگىندە سۋعا تۇسۋگە بولمايتىن ورىندار تۋرالى ايتىپ بەردى، دەپ حابارلايدى قازاقپارات ءتىلشىسى.

«الماتى قالاسى مەن تاۋ بوكتەرىندەگى ايماقتاردا 44 سۋ قويماسى بار. ولارعا وزەندەر، كولدەر، ارنالار، توعاندار كىرەدى. ونىڭ ىشىندە 12 ءسى تۇرعىندار ءۇشىن قاۋىپ توندىرەدى»، - دەدى ءانۋار يۋسۋپوۆ.

ونىڭ سوزىنشە، تومەندە اتالعان سۋ ايدىندارىندا شومىلۋ ادام ومىرىنە قاۋىپ توندىرەدى.

1. بايبەسىك جانە وجەت شاعىناۋداندارى اراسىندعى اتاۋى جوق سۋ ايدىنى - الاتاۋ اۋدانى)؛

2. ۇلكەن الماتى وزەنى (شاڭىراق-2 شاعىناۋدانىندا) - الاتاۋ اۋدانى؛

3. ۇلكەن الماتى وزەنى (ءال-فارابي داڭعىلىنداعى كوپىردەن بوگەتكە دەيىن) - بوستاندىق اۋدانى؛

4. پەرۆومايسكي توعاندارى («كەمەل» شاعىناۋدانىندا) - جەتىسۋ اۋدانى؛

5. كىشى الماتى وزەنى (بۋتاكوۆكاعا بۇرىلاتىن تۇستا) - مەدەۋ اۋدانى؛

6. كىشى الماتى وزەنى (ورتالىق مادەنيەت جانە دەمالىس ساياباعىندا) - مەدەۋ اۋدانى؛

7. تەررەنكۋر توعانى - مەدەۋ اۋدانى؛

8. يۋبيلەينوە كولى - مەدەۋ اۋدانى؛

9. اۋەجاي كولى - تۇركسىب اۋدانى؛

10. قايرات كەنتىندەگى كول - تۇركسىب اۋدانى ؛

11. قاراسۋ وزەنىنىڭ ساعاسى (شەستۋحا) - تۇركسىب اۋدانى؛

12. اقساي وزەنى - ناۋرىزباي اۋدانى.

سپيكەر قالا تۇرعىندارى مەن قوناقتارىنا سۋدا شومىلۋ كەزىندە قاۋىپسىزدىكتى ساقتاۋعا شاقىرىپ، جاۋاپسىزدىقتىڭ ارتى اۋىر زارداپتارعا اكەلەتىنىن ەسكەرتتى.