ۇشىق نەگە شىعادى؟

استانا. قازاقپارات - بىردەڭەدەن جيىركەنسەڭىز، ۇشىق شىعىپ كەتەدى دەگەندى ءسىز دە ەستىگەن بولارسىز؟! بۇل قانشالىق دۇرىس ايتىلعان جانە ۇشىقتى قالاي جىلدام كەتىرۋگە بولادى؟

بۇل سۇراقتارعا نيەۆرولوگ جانە نۋتريسيولوگ ۇلجالعاس سمانوۆا ءوزىنىڭ Instagram پاراقشاسىندا جاۋاپ بەردى.

دارىگەردىڭ ايتۋىنشا، بۇل تەك جيىركەنسە شىعاتىن جارا ەمەس.

«قوناققا بارا قالساڭ، كەي ادامدار تاماقتان بۇرىن دا، كەيىن دە اۋىز شايىپ، ۇشىنىپ كەتەتىنىم بار دەپ جاتادى. كەز كەلگەن نارسەدەن جيىركەنگەسىن ارينە ۇشىق شىعادى. ءسىز دە وسى ويمەن كەلىسەسىز بە؟ ءبىراق ءسىز ءۇشىن تاڭسىق بولسا دا ايتايىن، ۇشىق جيىركەنسە عانا شىعاتىن، ياعني ەموتسيالىق كوڭىل-كۇيگە قاراي شىعاتىن جارا ەمەس»، - دەدى دارىگەر.

ۇشىقتى مەديتسينا تىلىمەن گەرپەس دەپ اتايدى. دارىگەردىڭ ايتۋىنشا، ول كەنەتتەن شىعاتىن جارا ەمەس.

«بۇل، اسىرەسە، يممۋنيتەت تومەن كەزدە شىعادى جانە اعزادا ۇزاق ۋاقىت ساقتالادى. گەرپەستىڭ جۇعۋ ءقاۋپى بولعان سوڭ دا گيگيەنانى ۇستانۋ كەرەك، ەمدەلۋ كەرەك. ۇشىق شىعا باستاعان كەزدە- اق ەمدى نەعۇرلى ەرتە باستاعان دۇرىس. سوندا عانا جىلدام جازىلادى. ادەتتە ءجيى جىبەرەتىن قاتەلىگىمىز - ۇشىققا جاقپاماي (ماز) جاعۋ. ول ەمدەمەيدى دەمەيمىن. جاقپاماي جارانىڭ سىرتقى بەتىن جازادى. ال ونىڭ الدىن الۋ ءۇشىن، ءجيى شىعا بەرمەس ءۇشىن تەكسەرىلگەن دۇرىس»، - دەپ ەسكەرتتى ۇلجالعاس سمانوۆا.

دارىگەر ءۇي جاعدايىندا ەمدەلۋدىڭ بىرنەشە جولىن ۇسىندى:

تەڭىز تۇزىمەن تاجىريبە جاساپ كورىڭىز. الدىمەن تاماقتى شايقاپ، ارتىنشا ونى بورتكەن جەردىڭ ۇستىنە دە جاعۋعا بولادى. سودان سوڭ تازا سۋمەن شايىپ جىبەرىڭىز.

گەرپەستى شايمەن ەمدەۋگە دە بولادى. ول ءۇشىن قۇرامىندا ۆيرۋسقا قارسى زاتتارى بار شايدى قولدانىڭىز. مىسالى، قارا جانە كوك شايدىڭ قۇرامىندا ۆيرۋسقا قارسى قابىلەتكە يە تانيندەر بار. اۋرۋمەن كۇرەسۋگە كومەكتەسەتىن انتيوكسيدانتتار دا بار. جالبىز بەن تۇيمەداق قوسىلعان شايلاردا دا وسى اتالعان قاسيەتتەر بار. شايدى ءىشۋ جەڭىل. ارينە، ونىڭ اسەرى بىردەن بىلىنبەيدى، ءبىراق پايداسى بار. سونداي-اق ۇشىقتىڭ ۇستىنە قالتا شايلارىن قويۋعا بولادى.

گەرپەستى گەمامەليستىڭ كومەگىمەن ەمدەۋگە بولادى. ونى دا سۇيىق قۇرال رەتىندە ماقتانىڭ ۇستىنە جاعادى. بۇل ءادىس بورتكەن جەرلەردى قۇرعاتىپ، جازىلۋدى جىلدامداتادى. ءبىراق اللەرگيا بار- جوعىن ءبىلىپ الۋ ءۇشىن ونى الدىمەن شىنتاقتىڭ ىشكى تۇسىنا جاعىڭىز.

ادەتتە، اتسيكلوۆير، فامتسيكلوۆيرى بار كرەمدەر ءجيى جاعىپ جاتادى. ءبىراق ولاردىڭ پايداسىنان گورى زيانى كوپ بولعاندىقتان، ولاردى تەك سوڭعى ساتتە عانا ۇسىنادى.