ساراپشى: سينگاپۋر كومپانيالارىنا قىتايدىڭ «ءبىر بەلدەۋ، ءبىر جول» باستاماسى قىزىق بولۋى مۇمكىن
«2022 -جىلى قازاقستان مەن سينگاپۋر اراسىنداعى ەكىجاقتى ساۋدا كولەمى 1,9 ميلليارد دوللارعا جەتتى. ەكى ەلدىڭ اراسى قاشىق ەكەنىن ەسكەرسەك، بۇل ايتارلىقتاي كورسەتكىش.
ايتا كەتۋ كەرەك، بۇل 2021 -جىلمەن سالىستىرعاندا شامامەن %30 ارتىق. دەمەك، ەكىجاقتى ساۋدادا ديناميكا بار»، - دەدى ساراپشى.
ونىڭ ايتۋىنشا، ەكىجاقتى ارىپتەستىكتىڭ باسىم باعىتى قارجى سالاسى بولماق.
«سينگاپۋردىڭ جەتىستىگى تۋرالى ايتساق، قازىرگى تابىستى بايلانىستىڭ كوپتەگەن سەبەبى بار. ونىڭ ءبىرى - سينگاپۋر وڭتۇستىك- شىعىس ازياداعى نەگىزگى قارجىلىق حاب ەكەنى. بۇل ەل ASEAN ەلدەرى مەن قىتاي ءۇشىن دە ماڭىزدى قارجىلىق حاب بولىپ وتىر. باتىس كاپيتالىنىڭ ازيا نارىعىنا كىرەتىن تەرەزەسى دە وسى ەل. ءبىز دە وسى سحەمانى قۇرىپ جاتىرمىز. قازاقستاندا استانا حالىقارالىق قارجى ورتالىعى بار. ياعني، ءبىر- بىرىمىزدەن ۇيرەنەرىمىز كوپ» - دەدى ول.
ساراپشى قازاقستان سينگاپۋر ءۇشىن مۇناي، گاز، مەتال سياقتى تابيعي رەسۋرسىمەن عانا ەمەس، ساۋدا سالاسىنداعى الەۋەتىمەن دە قىزىقتى.
«سينگاپۋردىڭ جەرى شاعىن. ازىق-تۇلىكتى تۇگەل دەرلىك كورشى ەلدەردەن يمپورتتايدى. ال اۋىز سۋدى مالايزيادان الادى. قازاقستان سينگاپۋر ءۇشىن ازىق-تۇلىك ونىمدەرىن تاسىمالداۋ سالاسىنداعى سەنىمدى ارىپتەس بولا الادى. سينگاپۋر پرەزيدەنتى ونداعى كومپانيالاردىڭ قازاقستانمەن ارىپتەستىككە مۇددەلى ەكەنىن، اسىرەسە كولىك جانە لوگيستيكا، قۇرعاق پورتتار باعىتىنداعى بىرلەسكەن جوبالاردى ىسكە اسىرۋعا نيەتتى ەكەنىن ايتتى. قىتايدىڭ «ءبىر بەلدەۋ، ءبىر جول» باستاماسى اياسىندا قازاقستان اۋماعى ارقىلى وتەتىن جۇك تاسىمالىنىڭ ارتقانىن كورىپ وتىرمىز. سينگاپۋر كومپانيالارى دا وسى جوباعا قوسىلا الادى. ولارعا ءبىزدىڭ ەلدە كوپتەگەن مۇمكىندىكتەردىڭ ەسىگى اشىق»، - دەيدى ەرسۇلتان جانسەيىتوۆ.
