قازاقستان مەن قىتاي ج و و-لارى تەمىرجول كادرلارىن بىرلەسىپ دايارلاماق

الماتى. قازاقپارات - قازاقستان پرەزيدەنتى قاسىم-جومارت توقايەۆتىڭ قىتايعا ساپارى اياسىندا ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ دەلەگاتسياسى سيان تەمىرجول كاسىپتىك-تەحنيكالىق ينستيتۋتىندا بولىپ، ماشينا جاساۋ، كولىك جانە لوگيستيكا سالالارى بويىنشا ىنتىماقتاستىق تۋرالى كەلىسىمگە قول قويدى، دەپ حابارلايدى قازاقپارات ءتىلشىسى.

ج و و-نىڭ باسپا ءسوز قىزمەتىنەن ءمالىم ەتكەندەي، تاراپتار قازاقستان مەن قىتايدىڭ لوگيستيكا سالاسىنداعى ىنتىماقتاستىعى اياسىندا ستۋدەنتتەرمەن الماسۋ، تەحنولوگيالار ترانسفەرتى، عىلىم مەن تەحنيكا سالاسىنداعى ورتاق جوبالار جانە تەمىرجول ينجەنەرلەرىن دايارلاۋ باعدارلاماسىن ىسكە قوسۋعا ۋاعدالاستى.

«كەلىسىم بويىنشا قازاقستاندىق ستۋدەنتتەر «1+3» باعدارلاماسى بويىنشا قىتايعا وقۋعا بارۋعا مۇمكىندىك الادى. ءبىرىنشى وقۋ جىلىندا ولار قىتاي ءتىلىن ۇيرەنەدى، ال كەلەسى ءۇش جىل باكالاۆريات باعدارلاماسى بويىنشا ماماندىق الۋعا ارنالادى. قىتاي تاراپى مۇنداي ستۋدەنتتەرگە شاكىرتاقى بەرىپ، قولداۋ كورسەتەدى. بۇل رەتتە ساتبايەۆ ۋنيۆەرسيتەتى مەن سيان تەمىرجول كاسىپتىك- تەحنيكالىق ينستيتۋتى ءبىر- ءبىرىنىڭ وقۋ كرەديتتەرىن ەسەپتەپ، ستۋدەنتتەر مەن وقىتۋشىلاردى ءوزارا الماستىرىپ وتىرادى. وقۋ ۇدەرىسىن جەڭىلدەتۋ ءۇشىن، پوليتەحتا تسينلين ينستيتۋتىنىڭ بازاسى نەگىزىندە قىتاي ءتىلى كۋرستارى اشىلادى»، - دەلىنگەن اقپاراتتا.

سونداي-اق ەكى جاقتى ىنتىماقتاستىق اياسىندا بولاشاقتا ساتبايەۆ ۋنيۆەرسيتەتىنىڭ بازاسىندا سيان تەمىرجول كاسىپتىك- تەحنيكالىق ينستيتۋتىنىڭ فيليالى قۇرىلادى دەپ كۇتىلۋدە. وندا قازاقستان مەن ورتالىق ازيا ەلدەرىنىڭ كولىك جانە كوممۋنيكاتسيالار سالاسىنا قاجەتتى كاسىبي ماماندار دايارلاۋ ءۇشىن يننوۆاتسيالىق زەرتحانالار اشىلىپ، تەمىر جول كولىگى مەن لوگيستيكا سالاسى بويىنشا حالىقارالىق جوبالار جۇرگىزىلمەك.

ەسكە سالايىق، وسى كۇندەرى مەملەكەت باسشىسى ق. توقايەۆ مەملەكەتتىك ساپارمەن قىتايدا ءجۇر.

كەشە ءبىرقاتار بىرلەسكەن قۇجاتقا قول قويىلدى.

ونىڭ ىشىندە قازاقستان مەن قىتاي ج و و-لارى اراسىنداعى وزگە دە كەلىسىمدەر بار.