شەتەلدەگى قازاقتارعا «وتانداستار قورى» قانداي قولداۋ كورسەتتى
«قازىرگى تاڭدا، شەتەلدەگى قازاقتاردىڭ ءتۇرلى سەبەپتەرمەن ءوزىنىڭ ەتنيكالىق بىرەگەيلىگىنەن اجىراپ بارا جاتقانى اقپارات قۇرالدارىندا ءجيى كوتەرىلىپ ءجۇر. سول مەكەندەگەن ەلىنىڭ تيتۋلدىق ۇلتتارىنىڭ مادەنيەتىن تولىقتاي ءسىڭىرىپ، ءتىلىن ۇمىتىپ، اككۋلتۋراتسيا مەن اسسيميلياتسياعا ۇشىراپ جاتىر. مۇنى ەشكىم جوققا شىعارا المايدى. سوندىقتان، «وتانداستار قورىنىڭ» وسى ورايداعى مىندەتى - سول شەتەلدەگى قازاقتاردىڭ كوزىندەگى تاريحي وتانى قازاقستانعا دەگەن قىزىعۋشىلىق وتىن سوندىرمەۋ، بويلارىنداعى ءوشىپ بارا جاتقان ۇلتتىق سانا-سەزىمدەرىن وياتۋ، ءداستۇرلى قۇندىلىقتاردى ءتىرىلتۋ بولۋى ءتيىس»، - دەدى ابزال ساپاربەك ۇلى قور جانىنداعى قوعامدىق كوميسسيانىڭ وتىرىسىندا.
سونىمەن قاتار، قور باسشىسى سىرتقى ساياساتتاعى جۇمساق كۇش قاعيداتىمەن قازاقستاننىڭ جەتىستىكتەرى، ەلىمىزدىڭ الەۋمەتتىك- ەكونوميكالىق دامۋىنا قاتىستى ۇلتتىق جوبالار مەن باعدارلامالارى تۋرالى، جالپى قازاقستانعا قىزىعۋشىلىق پەن سۇيىسپەنشىلىكتى ارتتىرۋ باعىتتارى بويىنشا اقپاراتتىق-كونسۋلتاتسيالىق ساياساتتى كۇشەيتۋ ماڭىزدى ەكەنىن ايتتى.
2022-جىلى «وتانداستار قورى» الەمنىڭ 40 قا جۋىق ەلىندە اشىلعان 100 گە جۋىق قازاق ۇيىمىنىڭ باسشىلارىمەن جانە بەلسەندىلەرىمەن كەزدەسكەن. شەتەلدەگى قازاق ۇيىمدارى تۋرالى اقپاراتتىق انىقتاما بازاسى دايىندالىپ، ورتاق چات قۇرىلعان.
«وتانداستار قورى» شەتەلدەگى قازاقتارعا مەملەكەتىمىزدىڭ جاناشىرلىعىن كورسەتۋ ءۇشىن سۇرانىستارىنا ساي قولداۋ كورسەتىپ كەلەدى. وتكەن جىلى ەۋروپاداعى قازاق قۇرىلتايى، وزبەكستانداعى، قىرعىزستانداعى قارىم- قاتىناستىڭ 30 جىلدىق مەرەيتوي شارالارىندا بىرگە جۇمىس ىستەدىك. التاي قازاقتارىنىڭ تۇركياعا كوشىنىڭ 70 جىلدىعىنا وراي «قازاق-تۇرىك باۋىرلاستىعى» ەسكەرتكىشى اشىلدى، حالىقارالىق كونفەرەنسيا ءوتتى. تۇركيانىڭ الانيا قالاسىندا «Abai Uiy» مادەني-ىسكەرلىك ءۇيىنىڭ وكىلدىگى اشىلدى. رەسەيدىڭ ورىنبور، ومبى، استراحان قالالارىندا، يراننىڭ گورگون قالالارىندا قانداستارىمىزبەن بىرگە بولدىق. شەتەلدەگى مۇنداي باسقوسۋلاردا قازاقتاردىڭ مارتبەسى مەن ابىرويىن ءتۇرلى مازمۇندىق شارالارمەن كوتەرىپ كەلەمىز»، - دەدى ا. ساپاربەك ۇلى.
سونىمەن بىرگە، «قورجىن» جوباسى شەڭبەرىندە 2022-جىلى 17 ەلدەگى 43 قازاق ۇلتتىق- مادەني ورتالىعىنا ماتەريالدىق كومەك كورسەتىلگەن.
«قانداستاردىڭ كوڭىلىن مارقايتقان مازمۇندى كەزدەسۋلەر ەلىمىزدە دە كوپتەپ ۇيىمداستىرىلدى. سولاردىڭ ءبىرى - شەتەلدە ۇلتتىق ونەرىمىز بەن قۇندىلىقتارىمىزدى دارىپتەيتىن ونەرپازدار مەن قولونەر شەبەرلەرىنىڭ «قاسيەتتى قازاق ەلى» ونەر فەستيۆالى. تاراز قالاسىنداعى فەستيۆالگە 145 ۇمىتكەر كەلدى. الەمنىڭ 10 ەلىندە تۇراتىن 500 گە جۋىق قانداسىمىز اراسىندا جۇلدەلى جانە ەرىكتى شىعارماشىلىق بايقاۋلار ءوتتى. دومبىرا كۋرسى سياقتى ەرىكتى جوبالار جالعاستى. «كيەلى قازاقستان» جوباسىندا الەمنىڭ 10 ەلىنەن كەلگەن 31 قانداسىمىز جاڭادان قۇرىلعان اباي وبلىسىندا بولدى. جوبانىڭ ماقساتى - ولاردىڭ ەلدەگى قازاق جاستارىمەن جانە شەتەلدەن كەلگەن قۇربى- قۇرداستارىمەن پىكىر الماسىپ، بايلانىس قۇرۋ»، - دەيدى قور باسشىسى.
اقمولا وبلىسىندا 2 اپتاعا سوزىلعان «جازعى لاگەرگە» 10 ەلدەن 80 نەن استام قازاق بالاسى قاتىستى. بيىلعى جازعى لاگەرگە 185 بالا قاتىسادى دەپ جوسپارلانىپ وتىر.
«قورىمىزدىڭ قازاق ءتىلىن ۇيرەتۋ باعىتىنداعى اعارتۋشىلىق جوبالارى جالعاسىن تاپتى. 4 تىلدە جۇرگىزىلگەن «ونلاين قازاق ءتىلى كۋرسىندا» جانە الەمنىڭ 8 ەلىندەگى 10 قالاسىنداعى «وفلاين قازاق ءتىلى كۋرسىندا» مىڭنان استام قانداس قازاق ءتىلىن تەگىن ۇيرەندى. الەمنىڭ 7 ەلىندە قازاق تىلىنەن ءدارىس وقيتىن 80 گە جۋىق ءمۇعالىم ارنايى «بىلىكتىلىكتى ارتتىرۋ» كۋرسىنان ءوتتى»، - دەدى سپيكەر.
بۇدان بولەك، قانداس قالامىنان تۋىنداعان ەڭبەكتەرگە كوڭىل ءبولىندى. 2022-جىلى ق ر پرەزيدەنتى ءارحيۆىنىڭ قولداۋىمەن دۇنيەجۇزى قازاقتارى قاۋىمداستىعىنىڭ بۇرىنعى ءتورالقا مۇشەلەرى دالەلحان جانىمحان ۇلىنىڭ «قۇجاتتار جيناعى» كىتابى جارىق كورگەن. التايدان ءۇندىستان مەن پاكىستان ارقىلى تۇركياعا جەتكەن ايتۋلى كوشتىڭ كوزى ءتىرى كۋاگەرى، قوعام قايراتكەرى، 100 جاسقا تاياعان ءابدىراحمان چەتين جالەل ۇلىنىڭ ء«ومىر جولىمداعى سوڭعى كوش» كىتابى تانىستىرىلعان.
قور جانىنداعى «قانداستاردى اقپاراتتىق قولداۋ ورتالىعىنا» جانە 14 وڭىردەگى «فرونت- كەڭسەلەرىنە» قانداستار مەن شەتەلدەگى ەتنيكالىق قازاقتاردان تۇسكەن 6318 وتىنىشكە اقپاراتتىق- كونسۋلتاتسيالىق قىزمەت كورسەتىلگەن.
قونىس اۋدارۋعا باسىمدىققا يە 5 ءوڭىردىڭ الەۋمەتتىك- ەكونوميكالىق دامۋى تۋرالى جانە قولايلى ەلدى مەكەندەردى تاڭداۋعا مۇمكىندىك بەرەتىن «erulik.kz» ۆەب-پلاتفورماسى ودان ارى جەتىلدىرىلدى. وتكەن جىلى ۆەب-پلاتفورمانىڭ قىزمەتىن 4200 دەن استام ادام پايدالانعان.
