قازاقستاننان ەۋرووداق ەلدەرىنە باراتىن ازاماتتارعا ۆيزالىق رەجيم جەڭىلدەۋى مۇمكىن

بريۋسسەل. قازاقپارات - قازاقستان پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ بريۋسسەلگە جۇمىس ساپارى اياسىندا ىشكى ىستەر بويىنشا ەۋروپالىق كوميسسار يلۆا يوحانسسونمەن كەزدەسۋ وتكىزدى، دەپ حابارلايدى قازاقپارات.

كەلىسسوزدەر ناتيجەسىندە تاراپتار ق ر ازاماتتارى ءۇشىن ۆيزالىق رەجيمدى جەڭىلدەتۋ تۋرالى رەسمي كونسۋلتاتسيالاردى باستاۋ جونىندە ۋاعدالاستىققا قول جەتكىزدى.

م. نۇرتىلەۋ سۇحباتتاسىن قازاقستاننىڭ ۆيزالىق ساياساتى، ق ر تاراپىنان ە و ءۇشىن كوشى- قون تاۋەكەلدەرىنىڭ بولماۋى، قازاقستان ۇكىمەتى زاڭسىز كوشى- قونعا قارسى كۇرەس بويىنشا قابىلداپ جاتقان شارالار جانە وسى باعىتتاعى جۇمىستىڭ باسقا دا ماڭىزدى اسپەكتىلەرى تۋرالى ەگجەي- تەگجەيلى حاباردار ەتتى.

ءوز كەزەگىندە ي. يوحانسسون ەۋرووداق قازاقستانمەن ءوزارا ءتيىمدى ىنتىماقتاستىقتى ودان ءارى نىعايتۋعا مۇددەلى ەكەنىن جانە تاراپتاردىڭ ازاماتتارى اراسىنداعى بايلانىستاردى كەڭەيتۋگە ۇمتىلاتىنىن مالىمدەدى.

ەۋروكوميسساردىڭ پىكىرىنشە، قازاقستان مەن ە و اراسىنداعى ستراتەگيالىق ارىپتەستىكتىڭ ماڭىزدى كورسەتكىشتەرىنىڭ ءبىرى تۇراقتى مادەني- گۋمانيتارلىق الماسۋدى قولداۋ.

سىندارلى كوزقاراسى ءۇشىن ەۋروپالىق تاراپقا شىن جۇرەكتەن العىس بىلدىرە وتىرىپ، ق ر س ءى م باسشىسى ۆيزالىق رەجيمدى جەڭىلدەتۋ قازاقستاندىقتاردىڭ ۇمىتىنە جاۋاپ بەرىپ قانا قويماي، ق ر مەن ە و اراسىنداعى ىنتىماقتاستىقتىڭ بارلىق كەشەنىن دامىتۋعا ەلەۋلى سەرپىن بەرەتىنىن اتاپ ءوتتى.

2017 -جىلدان باستاپ قازاقستان ە و- نىڭ بارلىق مەملەكەتتەرىنىڭ ازاماتتارى ءۇشىن ىسكەرلىك ىنتىماقتاستىقتى، تۋريزمدى جانە ادامي بايلانىستاردى دامىتۋ ءۇشىن ءبىرجاقتى تارتىپپەن ۆيزاسىز رەجيم ەنگىزدى.

ۆيزالىق رەجيمدى جەڭىلدەتۋ قاجەتتى قۇجاتتار ءتىزىمىن قىسقارتۋدى، ۆيزالاردىڭ ۇزاقتىعى مەن جيىلىگىن ارتتىرۋدى جانە ت. ب. قامتيدى.