پرەزيدەنت سۋ جانە ەكولوگيا پروبلەمالارى بويىنشا تاپسىرمالار بەردى
قازاقپارات بۇل تۋرالى اقورداعا سىلتەمە جاساپ حابارلايدى.
ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا ەكولوگيالىق قاۋىپسىزدىكتىڭ جاي-كۇيى جونىندە بايانداما جاسادى. سونداي-اق ءبىرقاتار مەملەكەتتىك ورگان باسشىلارى مەن ءوڭىر اكىمدەرى جەكەلەگەن ماسەلەلەر بويىنشا ەسەپ بەردى.
پرەزيدەنت وتىرىس بارىسىندا ەكولوگيالىق قاۋىپسىزدىككە قاتەر توندىرەتىن تابيعي جانە انتروپوگەندىك فاكتورلارعا قارسى كۇرەس اسا ماڭىزدى ەكەنىن اتاپ ءوتتى.
«سوڭعى جىلدارى كوپتەگەن ەلدىڭ ۇكىمەتتەرىنىڭ بەلسەندىلىگى ارتتى. ەكولوگيانى جاقسارتۋ، «جاسىل» ەكونوميكاعا كوشۋ جانە كومىرسۋتەگى بەيتاراپتىعىنا قول جەتكىزۋ ءۇشىن باتىل شەشىمدەر قابىلدانىپ جاتىر. ۇرپاعىمىزدىڭ دەنى ساۋ بولىپ، اۋاسى تازا ەلدە ءومىر سۇرگىمىز كەلسە جانە مەملەكەتىمىزدى بۇكىل الەم مويىنداعانىن قالاساق، ءبىز ولاردان ۇلگى الۋىمىز كەرەك»، - دەدى قاسىم-جومارت توقايەۆ.
مەملەكەت باسشىسى ەكولوگيا سالاسىندا شۇعىل شەشىم قابىلداۋدى قاجەت ەتەتىن پروبلەمالارعا باسا نازار اۋداردى.
«كەڭەس كەزەڭىنەن كەلە جاتقان كوپتەگەن ءوندىرىس ورنى، كومىر جاعاتىن ەلەكتر ستانتسيالارى مەن قازاندىقتار ەكولوگيالىق احۋالدىڭ ناشارلاۋىنا اكەپ سوقتىردى»، - دەدى پرەزيدەنت.
بۇدان بولەك، جيىندا قورشاعان ورتانى قورعاۋعا ۇلكەن جاۋاپكەرشىلىكپەن قاراۋ جونىندە ءبىرقاتار ماسەلە كوتەرىلدى.
پرەزيدەنت وبلىستار مەن رەسپۋبليكالىق ماڭىزى بار قالالار باسشىلارىنىڭ نازارىن رۇقسات ەتىلمەگەن جەرلەردەگى قوقىستاردى جويۋ جانە قوقىس وڭدەۋ كورسەتكىشتەرىنىڭ تومەن ەكەنىنە اۋداردى.
قاسىم-جومارت توقايەۆ كۇن تارتىبىندەگى ماسەلەلەردى قاراستىرۋ ناتيجەسىندە ۇكىمەتكە ۇلتتىق ەكولوگيالىق ستاندارتتاردى الەمدىك ستاندارتتارعا سايكەستەندىرۋ، ءوندىرىس ورىندارىنىڭ زياندى شىعارىندىلارىن ازايتۋ، قاتتى تۇرمىستىق قالدىقتاردى قايتا وڭدەۋ، رۇقسات ەتىلمەگەن جەرلەردەگى قوقىستاردى جويۋ جانە ەروزياعا ۇشىراعان جەرلەردى قايتا قالپىنا كەلتىرۋ جونىندە ءبىرقاتار تاپسىرما بەردى.
قاراعاندى وبلىسى شەت اۋدانىنداعى ەگىستىك القاپتارىن قالپىنا كەلتىرىپ، مال شارۋاشىلىعىن دامىتۋعا قاتىستى پيلوتتىق جوبانىڭ جۇزەگە اسىرىلۋ تاجىريبەسىن ەلىمىزدىڭ وزگە وڭىرلەرىندە قولدانۋ ماقساتىندا جان-جاقتى زەرتتەۋگە تاپسىرما بەرىلدى.
جيىن بارىسىندا سۋ قاۋىپسىزدىگى سالاسىنداعى قاۋىپ-قاتەر دەڭگەيىنىڭ ارتىپ كەلە جاتقانى اتاپ ءوتىلدى.
مەملەكەت باسشىسى ەكونوميكانىڭ بارلىق سالاسىندا، اسىرەسە اگروونەركاسىپ كەشەنىندە سۋدى ۇنەمدى پايدالانۋ جانە سۋ شىعىنىن ازايتۋ ءۇشىن جۇيەلى تاسىلدەر قاجەت ەكەنىنە توقتالدى. سەبەبى توعانداردىڭ جانە سۋ رەسۋرستارى شىعىنىنىڭ نەگىزگى بولىگى وسى اۋىل شارۋاشىلىعى سالاسىنا تيەسىلى.
سۋ ۇنەمدەيتىن تەحنولوگيانى ەنگىزۋ جانە سۋدى ءتيىمدى تۇتىنۋدى ەكونوميكالىق تۇرعىدا ىنتالاندىرۋ شارالارىن دامىتۋمەن قاتار، سۋ شارۋاشىلىعى ينفراقۇرىلىمىن، اتاپ ايتقاندا، سۋدى پايدالانۋ مولشەرىن ەسەپتەۋ، مونيتورينگ جۇرگىزۋ جانە بولجام جاساۋ ءىسىن سيفرلاندىرۋدىڭ وزەكتىلىگى ارتىپ كەلەدى.
قاسىم-جومارت توقايەۆ سۋ شارۋاشىلىعى نىساندارى جۇمىسىنىڭ تيىمدىلىگىن جانە بولىنەتىن قارجىنى جۇمساۋدىڭ اشىقتىعى مەن ناتيجەلىلىگىن ارتتىرۋ ماسەلەلەرىنە ەرەكشە نازار اۋداردى.
پرەزيدەنت ۇكىمەتكە ەكولوگيا مەن سۋ سالالارىنداعى عىلىمي جانە كادرلىق الەۋەتتى كۇشەيتۋ ءۇشىن شارالار قابىلداۋدى تاپسىردى. 2030-جىلعا دەيىن كەزەڭدە سۋ رەسۋرستارىن باعالاۋ سالاسىندا ماقساتتى عىلىمي-زەرتتەۋ جوبالارى جۇزەگە اسىرىلادى. ونىڭ ناتيجەسى سۋ سالاسىن باسقارۋدا ەسكەرىلەدى.
مەملەكەت باسشىسى كۇن تارتىبىندەگى ەكىنشى ماسەلەنى تالقىلاۋ ناتيجەسىندە ساپالى اۋىزسۋدىڭ قولجەتىمدى بولۋى سۋ قاۋىپسىزدىگىنىڭ باستى كورسەتكىشى ەكەنىن اتاپ ءوتتى.
«حالىقتى اۋىزسۋمەن قامتاماسىز ەتۋ جانە سۋ قورىن كەلەشەك ۇرپاققا ساقتاۋ ءۇشىن جان-جاقتى شارالار قابىلداۋ - ءبىزدىڭ تىكەلەي مىندەتىمىز»، - دەدى قاسىم-جومارت توقايەۆ.
جيىن سوڭىندا ۋاكىلەتتى مەملەكەتتىك ورگاندارعا ۇلتتىق قاۋىپسىزدىكتىڭ ەڭ ماڭىزدى باعىتى سانالاتىن سۋ قاۋىپسىزدىگىن قامتاماسىز ەتۋ جونىندە ءبىرقاتار تاپسىرما بەرىلدى.
