قازبا بايلىقتى يگەرۋگە ليتسەنزيا الۋشىلار قوسىمشا بونۋس تولەۋگە مىندەتتەلمەك
بۇل تۋرالى پرەمەر-ءمينيستردىڭ ءبىرىنشى ورىنباسارى رومان سكليار سەنات دەپۋتاتتارىنىڭ ساۋالىنا بەرگەن جاۋابىندا ايتتى، دەپ حابارلايدى قازاقپارات ءتىلشىسى.
«پارلامەنت ءماجىلىسىنىڭ دەپۋتاتتارى باستاماشىلىق ەتكەن «جەر قويناۋى جانە جەر قويناۋىن پايدالانۋ تۋرالى» كودەكسىنە جەر قويناۋىن پايدالانۋ سالاسىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا پايدالى قاتتى قازبالار بويىنشا جەر قويناۋىن پايدالانۋعا ليتسەنزيا بەرىلگەنگە دەيىن اۋكتسيون قورىتىندىلارى بويىنشا قول قويۋ بونۋسىن تولەۋ جونىندەگى مىندەتتەمە كوزدەلگەن.
بۇل اۋكتسيون وتكىزۋ جانە ليتسەنزيالار بەرۋ قاعيدالارىندا بەكىتىلگەن كەپىلدىك جارنامەن جانە وزگە دە تاسىلدەرمەن رەتتەلەدى»، - دەپ جازادى ول.
رومان سكلياردىڭ ايتۋىنشا، اتالعان وزگەرتۋلەر پرەزيدەنت اكىمشىلىگىنىڭ قاراۋىنا جولدانعان.
«قازىرگى تاڭدا زاڭ جوباسىنا ۇكىمەت دايىنداعان قورىتىندىنىڭ جوباسى پرەزيدەنت اكىمشىلىگىنىڭ قاراۋىندا جاتىر. وسىدان كەيىن پارلامەنت ماجىلىسىنە ەنگىزىلەدى»، - دەپ جازادى ۆيتسە-پرەمەر.
