قازاقستاندا «بوكس كۇنى» بولدى - مينيستر الەم چەمپيوناتىنداعى جەتىستىكتەر جايلى

استانا. قازاقپارات - كەشەگى جەتىستىكتى - تاريحي ۇلى جەڭىس دەپ ايتۋعا بولادى. بۇگىن ەلوردا اۋەجايىندا بوكستان الەم چەمپيوندارىن قارسى الۋ سالتاناتىندا مادەنيەت جانە سپورت ءمينيسترى اسحات ورالوۆ وسىلاي ايتتى، دەپ حابارلايدى قازاقپارات ءتىلشىسى.

«ولار وسى كۇننىڭ باتىرلارى دەپ ناقتى ايتۋعا بولادى. كەشەدەن بەرى ءبىزدىڭ باتىرلارىمىز كاسىبي بوكستا دا جەڭىسكە جەتىپ جاتىر. بەيرەسمي ايتساق، قازاقستاندا «بوكس كۇنى» بولدى. وسى جىلدىڭ كۇزىندە ازيا چەمپيوناتى وتەدى. كەلەر جىل - ۇلكەن سىناق جىلى. پاريجدە وليمپيادا وتەدى. سول سايىستارعا دايىندالىپ، سپورتشىلاردى قولداۋىمىز كەرەك»، - دەدى اسحات ورالوۆ.

سونداي-اق مينيستر بوكسشىلارىمىزدىڭ الەم چەمپيوناتىندا كورسەتكەن ناتيجەسى تاريحي جەڭىس ەكەنىن اتاپ ءوتتى.

«حالقىمىز بوكستىڭ «التىنىنا» ۇيرەنىپ قالدى. الايدا، ءبىراز جىل «التىن» بولماي قالدى. كەشەگى جەتىستىكتى - تاريحي ۇلى جەڭىس دەپ ايتۋعا بولادى. بولاشاقتا بۇل جەتىستىكپەن توقتامايمىز»، - دەپ ءمالىم ەتتى ۆەدومستۆو باسشىسى.

قوسا كەتسەك بۇگىن جەڭىمپازداردىڭ العاشقى لەگى ەلگە ورالدى. چەمپيونداردىڭ ەكىنشى توبى - سانجار تاشكەنباي مەن نۇربەك ورالباي استانا ۋاقىتىمەن ساعات 16:00 دە ەلورداعا قونادى.

ايتا كەتەيىك، قازاقستان قۇراماسى وزبەكستاندا وتكەن الەم چەمپيوناتىن 4 التىن، 1 كۇمىس مەدالمەن اياقتادى.