مەكتەپتەردە مەتال ىزدەيتىن قۇرىلعى ورناتىلۋى مۇمكىن

استانا. قازاقپارات - مەكتەپتەردى مەتال ىزدەۋ قۇرىلعىسىمەن جابدىقتاۋ ماسەلەسى تالقىلانىپ جاتىر. بۇل تۋرالى وقۋ-اعارتۋ ءبىرىنشى ۆيتسە-ءمينيسترى شولپان كارينوۆا ورتالىق كوممۋنيكاتسيالار قىزمەتىندە ايتتى، دەپ حابارلايدى قازاقپارات ءتىلشىسى.

«ءبىلىم ۇيىمدارى 100 پايىز بەينەباقىلاۋمەن جابدىقتالىپ، 80 پايىزدان استامى جەدەل باسقارۋ ورتالىعىنا قوسىلعان. ءبىلىم ۇيىمدارىنىڭ 74 پايىزى ماماندانعان كۇزەت ۇستايدى. ءبىلىم وشاقتارىنىڭ شامامەن 94 پايىزىندا «دابىل» تۇيمەسى بار. 2023-جىلدىڭ 1- قىركۇيەگىندە وسى پارامەترلەردىڭ ءبارى 100 پايىز كورسەتكىشپەن قامتاماسىز ەتىلۋى كەرەك. مەتالل ىزدەۋ قۇرىلعىسىنا كەلسەك، مۇنداي ۇسىنىس ەنگىزىلدى، قارالىپ جاتىر. پەداگوگتەر مەن ءبىلىم ۇيىمدارى تالقىلاپ جاتىر. شەشىم قابىلدانعان كەزدە رەسمي مالىمەت بەرەمىز»، - دەدى شولپان كارينوۆا.

اتالمىش شارادا ۆيتسە- مينيستر بيىل «جازعى مەكتەپ» جوباسى جالعاسپايتىنىن ايتتى.

«جازعى مەكتەپتەردى جۇرگىزۋ كوروناۆيرۋس ينفەكتسياسىنا بايلانىستى قولعا الىنعانىن بىلەسىزدەر. بيىل 1- ماۋسىمنان باستاپ جازعى دەمالىس باستالادى. مەكتەپتەر مەكتەپ جانىنان الاڭدار اشادى. بۇلار نەگىزىنەن باستاۋىش جانە ورتا بۋىن سىنىپتارىنا ارنالادى. ودان ۇلكەن بالالار دا جازعى دەمالىستى لاگەردە نەمەسە مەكتەپ جانىنداعى الاڭداردا وتكىزە الادى ، - دەدى ول.