ۇلتتىق قۇرىلتايدىڭ كەزەكتى وتىرىسىندا جاستاردى تاربيەلەۋ ماسەلەسى قارالادى

استانا. قازاقپارات - ۇلتتىق قۇرىلتايدىڭ كەزەكتى وتىرىسىندا ۇلتتىق يدەولوگيا جانە جاستاردى تاربيەلەۋ ماسەلەلەرىن قاراۋ جوسپارلانعان. بۇل جايىندا پرەمەر- ءمينيستردىڭ ورىنباسارى التاي كولگىنوۆ ءماجىلىس دەپۋتاتتارىنىڭ ساۋالىنا بەرگەن جاۋابىندا ءمالىم ەتتى، دەپ حابارلايدى قازاقپارات ءتىلشىسى.

التاي كولگىنوۆتىڭ ايتۋىنشا، ۇكىمەت وتانسۇيگىشتىك، ۇلتتىق قۇندىلىقتاردى قالىپتاستىرۋ، قازاقستاندىق بىرەگەيلىكتى دامىتۋ بويىنشا كەشەندى جۇمىستار جۇرگىزىپ كەلەدى. سونىڭ اياسىندا:

- مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋدى دامىتۋدىڭ 2023-2029 -جىلدارعا ارنالعان تۇجىرىمداماسىن؛

- جوعارى ءبىلىمدى جانە عىلىمدى دامىتۋدىڭ 2023 - 2029 -جىلدارعا ارنالعان تۇجىرىمداماسىن؛

- مادەني ساياساتتىڭ 2023-2029 -جىلدارعا ارنالعان تۇجىرىمداماسىن؛

- 2023-2029 -جىلدارعا ارنالعان مەملەكەتتىك جاستار ساياساتى تۇجىرىمداماسىن؛

- اقپاراتتىق دوكترينانى قابىلداعان.

«وسىعان قوسا، قوعامدىق بىرىگۋدى ودان ءارى دامىتۋ جونىندەگى يدەيالار مەن قادامداردى تۇجىرىمدايتىن ق ر پرەزيدەنت جانىنداعى ۇلتتىق قۇرىلتاي قىزمەت اتقارادى. ۇلتتىق قۇرىلتايدىڭ كەزەكتى وتىرىسىندا ۇلتتىق يدەولوگيا جانە جاستاردى تاربيەلەۋ ماسەلەلەرىن قاراۋ جوسپارلانعان. جالپى بۇگىنگى تاڭدا قولدانىستاعى تۇجىرىمدامالار مەن باعدارلامالاردا قازاقستاندىق بىرەگەيلىكتى، ۇلتتىق يدەولوگيالىق قۇندىلىقتاردى دارىپتەيتىن باعىتتار قاراستىرىلعان»، - دەپ جازادى التاي كولگىنوۆ.