بوكستان الەم چەمپيوناتى تاريحىندا قازاقستان ا ق ش- تان وزىپ، ءۇشىنشى ورىنعا كوتەرىلدى
فينالدا تاعى 3 وتانداسىمىز - ماحمۇد سابىرحان، اسلانبەك شىمبەرگەنوۆ پەن نۇربەك ورالباي جۇدىرىقتاسىپ، ءبارى جەڭىسكە جەتتى.
الدىڭعى الەم چەمپيوناتىنىڭ كۇمىس جۇلدەگەرى ماحمۇد سابىرحان (54 ك گ) بۇل فينالدا سول كەزدەگى قاتەلىكتەرىن قايتالاعان جوق. وتانداسىمىز رينگ قوجايىنى ويبەك دجۋرايەۆپەن جەكپە- جەكتە بار شەبەرلىگىن پاش ەتتى. مۇنى قاپتالداعى تورەشىلەر دە مويىندادى. ءتىپتى، 21 جاستاعى بوكسشىمىز 3-راۋندتا قىرعىز تورەشىسىنە 2 مارتە نوكداۋن تىركەتتى. قازاق بوكسشىسى وسىعان دەيىن شارشى الاڭدا كۋبا، گانا، ءۇندىستان مەن ماجارستان سپورتشىسىن ۇتقان.
ايتا كەتەيىك، ماحمۇد 2 جىل بۇرىنعى بەلگرادتاعى الەم چەمپيوناتىندا دا كۇمىس جۇلدەگە يە بولعان.
ۇلتتىق قۇراما كاپيتانى اسلانبەك شىمبەرگەنوۆ ءوزى قاتىسقان 2- الەم چەمپيوناتىندا توپ جاردى. وتانداسىمىز فينالدا (71 ك گ) تاعى ءبىر وزبەكستاندىق سايدجامشيد دجافاروۆتى تىزە بۇكتىردى. الدىڭعى جەكپە- جەكتەردە اسلانبەك ءۇندىستان، فرانسيا، يزرايل، ترينيداد جانە توباگو بوكسشىسىنان باسىم تۇسكەن.
نۇربەك ورالباي تاشكەنتتە ءوز سالماعىندا (80 ك گ) قارسىلاس شاق كەلتىرمەي تاعى ءبىر مارتە ءانۇرانىمىزدى شىرقاتتى. وتانداسىمىز شەشۋشى، كوپتىڭ قىزىعۋشىلىعىن تۋدىرعان جەكپە- جەكتە قىتاي اتىنان سىنعا تۇسەتىن ەتنيكالىق قازاق توقتاربەك تاڭاتقاندى ۇتتى. وسىعان دەيىن نۇربەك رەسەي، يوردانيا، تۇركيا مەن ازەربايجاننان كەلگەن بوكسشىلاردان باسىم تۇسكەن.
فينالداردىڭ العاشقى كۇنى ۇلتتىق قۇراماداعى ەڭ جەڭىل سپورتشى سانجار تاشكەنباي توپ جارىپ، چەمپيون اتانعان ەڭ جاس قازاق بوكسشىسىنا اينالدى. ال ودان كەيىن شارشى الاڭعا شىققان دۋلات بەكباۋوۆ (67 ك گ) قارسىلاسىنا جول بەرىپ، كۇمىس مەدالعا قول جەتكىزدى. وزبەكستانداعى دوداعا ۇلتتىق قۇراما بارلىق 13 سالماقتا سپورتشى اپاردى. بۇل قاتارداعى ساكەن بيبوسىنوۆ (51 ك گ)، سەرىك تەمىرجانوۆ (57 ك گ)، تالعات سىرىمبەتوۆ (60 ك گ)، ساناتالى تولتايەۆ (63,5 ك گ)، نۇرقانات رايىس (75 ك گ)، ساعىندىق توعامباي (86 ك گ)، ايبەك ورالباي (92 ك گ) مەن قامشىبەك قونقابايەۆ (92 + ك گ) جۇلدەگەرلەر قاتارىنان كورىنە المادى.
وسىلايشا، قازاقستان قۇراماسى تاشكەنتتە 4 التىن، 1 كۇمىس مەدالدى قورجىنعا سالىپ، جالپى ەسەپتە 2-ورىن الدى. كوش باسىندا جارىس قوجايىنى وزبەكستان قالدى. جالپى قازاقستان 1993 -جىلدان بەرى ەگەمەن ەل رەتىندە وسىمەن 16 رەت الەم چەمپيوناتىنا بىلعارى قولعاپ شەبەرلەرىن جىبەردى. قازىر ەنشىمىزدە 18 التىن، 16 كۇمىس، 22 قولا جۇلدە بار. وسىنىڭ ارقاسىندا جالپى ءا چ تاريحىنداعى مەدال ەسەبىندە قازاقستان ا ق ش- تى باسىپ وزىپ، 3-ورىنعا كوتەرىلدى. ءبىرىنشى ورىنعا - كۋبا، ەكىنشى ورىنعا رەسەي مەملەكەتتەرى جايعاسقان. ۇلتتىق قۇراما وسىعان دەيىن تەك 2013 -جىلى الماتىدا وتكەن دۇنيەجۇزى باسەكەسىندە 4 التىنعا يە بولعان.
«قۇرمەتتى قازاق ەلى، ءبارىڭىزدى شىن جۇرەكتەن قۇتتىقتايمىن! بۇل - بۇكىل ەلدىڭ جەڭىسى! تاشكەنتتەگى وسى الەم چەمپيوناتى قۇرامامىز ءۇشىن ەرەكشە ناتيجەمەن ەستە قالدى. بوكسشىلارعا قولداۋ كورسەتۋ ءۇشىن قازاقستاننان كوپ جانكۇيەر كەلگەنىن العاشقى كۇننەن بايقادىم. فەدەراتسيا مەن كوماندانىڭ اتىنان ولارعا راقمەت ايتامىن»، - دەدى قازاقستان بوكس فەدەراتسياسىنىڭ پرەزيدەنتى كەڭەس راقىشيەۆ فينالداردان كەيىن بەرگەن سۇحباتىندا.
تاعى ايتا كەتەيىك، الەم چەمپيوندارى حالىقارالىق بوكس قاۋىمداستىعىنان (IBA) 200 مىڭ ا ق ش دوللارىنان الدى. كۇمىس جۇلدەگەرلەرگە 100 مىڭ، قولا جۇلدەگەرلەردىڭ ءارقايسىسىنا 50 مىڭ ا ق ش دوللارى بەرىلدى. بيىلعى دودانىڭ جالپى جۇلدە قورى - 5,2 ميلليون ا ق ش دوللارى.
سونداي- اق قازاقستان بوكس فەدەراتسياسىنىڭ پرەزيدەنتى كەڭەس راقىشيەۆ وسى ناتيجەگە ۇلەس قوسقان مىرزاعالي ايتجانوۆ باستاعان باپكەرلەر قوسىنىن، بوكسشىلاردى، دارىگەرلەردى، عىلىمي توپتىڭ ماماندارىن ءوز ەسەبىنەن ماراپاتتايدى. بۇل رەتتە چەمپيون اتانعان ۇلتتىق قۇراما بوكسشىلارىنا سىياقى رەتىندە 100 مىڭ ا ق ش دوللارىنان تابىستايدى.
