الماتىداعى «قازاق راديوسىندا» انۋاربەك بايجانبايەۆ اتىنداعى ستۋديا اشىلدى - فوتو
بۇل تۋرالى اقپارات جانە قوعامدىق دامۋ ءمينيسترى دارحان قىدىرالى Facebook-پاراقشاسىندا جازدى، دەپ حابارلايدى قازاقپارات ءتىلشىسى.
«ۇلاعاتتى ءىس-شارا قايتالانباس داۋىس يەسىنىڭ، راديو ارداگەرىنىڭ 100 جىلدىعىنا وراي ۇيىمداستىرىلىپ وتىر.
«قازاقتىڭ لەۆيتانى» اتانعان انۋاربەك بايجانبايەۆ قازاق راديوسىندا 50 جىلداي جۇمىس ىستەدى. ونىڭ سانالى عۇمىرى وسى قاسيەتتى قارا شاڭىراقتا ءوتتى. ەكىنشى دۇنيەجۇزىلىك سوعىستىڭ اياقتالعانىن كەڭەس ەلدەرى ليەۆيتاننىڭ داۋىسىمەن ەستىسە، قازاق دالاسىنا جەڭىس حابارىن انۋاربەك بايجانبايەۆ جەتكىزدى.
قازاق ءسوز ونەرىنىڭ قادىر-قاسيەتى بايجانبايەۆتىڭ قوڭىر ءۇنى ارقىلى ايشىقتالدى. ايگىلى ديكتوردىڭ ەل رۋحانياتىنا قوسقان ەڭبەگىن دارىپتەۋ بارشامىزدىڭ ورتاق پارىزىمىز»، - دەپ جازدى اقپارات جانە قوعامدىق دامۋ ءمينيسترى.
ءىس-شاراعا ءانۋار بايجانبايەۆتىڭ ۇرپاقتارى، كوزىن كورگەن ارىپتەستەرى، راديو ارداگەرلەرى قاتىسىپ، جىلى لەبىزدەرى مەن ەستەلىكتەرىن ايتقان.
