قازاقستاندا جۇمىسسىز جاستاردىڭ سانى وسكەن
ۇلتتىق ستاتيستيكا بيۋروسىنىڭ، مالىمەتىنشە، رەسپۋبليكا ەكونوميكاسىنىڭ ءارتۇرلى سالالارىندا 9 ميلليون ادام جۇمىسپەن قامتىلعان. ولاردىڭ 6,9 ميلليونى (جۇمىسپەن قامتىلعانداردىڭ جالپى سانىنان 76,7 پايىز) جالدامالى قىزمەتكەر بولسا، 2,1 ميلليون ادام (جۇمىسپەن قامتىلعانداردىڭ جالپى سانىنان 23,3 پايىز) ءوزىن-ءوزى جۇمىسپەن قامتىعاندار. 15 جانە ودان جوعارى جاستاعى حالىقتىڭ جالپى سانىنا شاققانداعى جۇمىسپەن قامتۋ دەڭگەيى 65 پايىزدى قۇرادى.
«بىلتىرعى ءبىرىنشى توقسانمەن سالىستىرعاندا جالپى جۇمىسپەن قامتىلعاندار 72,3 مىڭ ادامعا ءوستى، ونىڭ ىشىندە جۇمىسپەن قامتىلعاندار - 39,5 مىڭ ادام، ءوزىن-ءوزى جۇمىسپەن قامتىعاندار - 32,8 مىڭ ادام.
جۇمىسپەن قامتىلعان حالىقتىڭ ەڭ كوپ ۇلەسى ساۋدا سالاسىندا (17,3 پايىز)، ءبىلىم بەرۋدە (12,9 پايىز)، ونەركاسىپتە (12,6 پايىز) جانە اۋىل شارۋاشىلىعىندا (11,5 پايىز) بايقالدى»، - دەپ جازدى ۆەدومستۆودان.
2023-جىلعى ءبىرىنشى توقساندا 453,5 مىڭ جۇمىسسىز ادام بولدى.
15 پەن 34 جاستاعىلار اراسىنداعى جۇمىسسىزدىق دەڭگەيى - 4,1 پايىز. جۇمىس ىستەمەيتىن جانە بىلىممەن نەمەسە كاسىپتىك وقۋمەن اينالىسپايتىن NEET جاستارىنىڭ ۇلەسى - 7,9 پايىز (422 مىڭ ادام).
ەڭبەك جانە حالىقتى الەۋمەتتىك قورعاۋ مينيسترلىگىنىڭ جۇمىسپەن قامتۋ ورگاندارىندا 2023-جىلعى ءساۋىر ايىنىڭ سوڭىنا 286,1 مىڭ جۇمىسسىز رەسمي تىركەلگەن. تىركەلگەن جۇمىسسىزداردىڭ ۇلەسى جۇمىس كۇشىنىڭ 3 پايىزىن قۇرادى.
