تۇركىستان وبلىسىندا كوشپەندىلەر ويىنى ءوتتى

تۇركىستان. قازاقپارات - تۇركىستان وبلىسىنداعى تولەبي اۋدانىندا كوشپەندىلەر ويىنى ءوتتى، دەپ حابارلايدى قازاقپارات ءتىلشىسى.

ءىس-شارا تولەبي الىبەك ۇلىنىڭ تۋعانىنا 360 جىل تولۋىنا وراي ۇيىمداستىرىلىپ وتىر. باستى ماقسات - جاستار اراسىندا قازاق حالقىنىڭ ۇلتتىق ويىندارىن، سالت-ءداستۇرىن، ادەت-عۇرپىن دارىپتەۋ، تۋعان ەلگە، جەرگە، ءوز وتانىنا دەگەن سۇيىسپەنشىلىك سەزىمدەرىن ارتتىرۋ.

ۇلتتىق سپورتتى ۇلىقتاۋعا ارنالعان شاراعا ارنايى قاتىسقان تۇركىستان وبلىسى اكىمىنىڭ ورىنباسارى بەيسەن تاجىبايەۆ كوشپەندىلەر ويىنىنىڭ ماڭىزدىلىعىن اتاپ ءوتىپ، كوماندالارعا ساتتىلىك تىلەدى. ال، تولەبي اۋدانىنىڭ اكىمى تولەگەن تەلعارايەۆ ءداستۇرى ۇلتتىق ويىنداردى دارىپتەۋ باعىتىنداعى جۇمىستارعا الداعى ۋاقىتتا دا ۇلكەن سەرپىن بەرىلەتىندىگىن جەتكىزدى

جالپى جۇلدە قورى 1,5 ميلليون تەڭگە قۇرايتىن سايىسقا قۇرامىندا 160 سپورتشىسى بار 16 كوماندا قاتىستى. 14 پەن 35 جاس ارالىعىنداعى جاستار قازاقشا كۇرەس، جامبى اتۋ، اۋدارىسپاق، قوشقار كوتەرۋ، ارقان تارتۋ، لاڭگى تەبۋ سەكىلدى سايىستاردان كۇش سىناستى.

ال، قورىتىندىسىندا كوماندالىق ەسەپ بويىنشا ءبىرىنشى ورىندى سارىاعاش اۋدانىنىڭ سپورتشىلارى قانجىعالاسا، ەكىنشى ورىن بايدىبەك اۋدانىنىڭ جاستارىنا بۇيىردى. ءۇشىنشى ورىندى تولەبي اۋدانىنىڭ قاتىسۋشىلارى مىسە تۇتتى.

ودان بولەك، «كوشپەندىلەر ويىنىنا» ارنايى ەرەكشە ۇلتتىق كيىممەن كەلگەن وتىرار، ساۋران اۋداندارى مەن ارىس قالاسىنىڭ كوماندالارى ارنايى نوميناتسياعا يە بولدى. جۇلدەگەر كوماندالار مەن نوميناتسيا يەگەرلەرىنە قارجىلاي سىيلىقتار مەن ارنايى كۋبوكتار بەرىلدى.