قازاقستاندىقتار جانۇياسىمەن تۇسكەن جارقىن سۋرەتتەرىن جاريالاپ، فلەشموبقا قاتىسا الادى
«قۇرمەتتى دوستار!
15- مامىر - حالىقارالىق وتباسى كۇنى. كەلەشەكتە بۇل داتانىڭ قازاقستاندىقتار ءۇشىن دە ماڭىزدى مەرەكەگە اينالارىنا سەنىم بىلدىرەمىن.
باقىتتى وتباسى - تابىستى مەملەكەتتىڭ وزەگى. الەۋمەتتىك زەرتتەۋلەر ناتيجەلەرىنە سەنسەك ءبىزدىڭ وتانداستارىمىزدىڭ دەنى وتباسىن - ەڭ باستى قۇندىلىق سانايدى ەكەن. دەسە دە، بۇل سالادا رەتتەۋدى قاجەت ەتەتىن پروبلەمالار جوق ەمەس: وتباسىندا بولاتىن تۇرمىستىق زورلىق-زومبىلىق، سانالى اتا-انا مەن وتباسى تاربيەسىندەگى اكەنىڭ ءرولى، كوپ بالالى وتباسىلاردىڭ ءال-اۋقاتىنىڭ تومەندىگى ت. ب.
جالپى وتباسى ساياساتىنا قاتىستى ماسەلەنىڭ بارلىعى پرەزيدەنت قاسىم-جومارت كەمەل ۇلىنىڭ ۇنەمى نازارىندا. مەملەكەت باسشىسىنىڭ تاپسىرماسى بويىنشا 2022-جىلى «2030-جىلعا دەيىنگى وتباسىلىق جانە گەندەرلىك ساياسات تۇجىرىمداماسى» قايتا پىسىقتالعان ەدى. ونىڭ نەگىزىندە مەملەكەت جانە قوعامدىق ينستيتۋتتار تاراپىنان وتباسىلاردىڭ ءال-اۋقاتىن ارتتىرۋ بويىنشا كەشەندى شارالار قابىلدانىپ جاتىر.
وزدەرىڭىزگە ءمالىم، مەملەكەت باسشىسى «تولىق ادام» تۇجىرىمداماسىن ۇنەمى ايتىپ جۇرەدى. بۇل دەگەنىمىز ءبىرىنشى كەزەكتە - اعا بۋىننىڭ اقىل-كەڭەسى مەن جيعان تاجىريبەسىن بويعا سىڭىرە وتىرىپ، جاڭا ءبىلىم الۋعا قۇلشىنىستى جاڭا زامان ادامى. ال مۇنداي جان-جاقتى تولىققاندى تۇلعانى باقىتتى، تاربيەلى، ماحاببات بيلىك قۇرعان تولىق وتباسى عانا تاربيەلەي الادى. سوندىقتان وتباسى قۇندىلىقتارىنىڭ العا وزىپ، ءال-اۋقاتتىڭ ءوسۋى قاي كەزدە دە مەملەكەت ءۇشىن دە، قوعام ءۇشىن دە ماڭىزدى مىندەت بولىپ قالا بەرەدى»، دەپ جازدى ۇلتتىق كوميسسيا ءتوراعاسى.
وسى ورايدا ول ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا الەۋمەتتىك جەلىلەردە وتباسى قۇندىلىقتارىن دارىپتەۋ بويىنشا ارنايى فلەشموب ۇسىناتىنىن ءمالىم ەتتى.
«ەلىمىزدىڭ بارلىق ازاماتتارىن وسى باستامانى قولداۋعا، وتباسى قۇندىلىعىن بىرىگە ناسيحاتتاپ، قورعاۋعا شاقىرامىن. وعان قاتىسۋ ءۇشىن ءتۇرلى الەۋمەتتىك پلاتفورمالاردا «#وتباسىم» حەشتەگىن بەلگىلەي وتىرىپ، وتباسىلىق تاربيە، ونىڭ ماڭىزى، جانۇيا مۇشەلەرىمەن تۇسكەن جارقىن سۋرەتتەر، باسقالارعا ۇلگى قىلىپ كورسەتۋگە تۇرارلىق تاعلىمدى جايتتار مەن قىزىقتى وقيعالارمەن ءتىپتى، ءاربىر ازاماتتىڭ ءوزىنىڭ ۇلگىلى وتباسىن كەلەشەكتە قالاي كورگىسى كەلەتىنى تۋرالى اسىل ارماندارىمەن بولىسۋگە بولادى. وسىلايشا، ءبىز وتباسى قۇندىلىعىن ناسيحاتتاۋعا شاعىن دا بولسا ماڭىزدى ۇلەسىمىزدى قوسا الامىز. 15- مامىر - حالىقارالىق وتباسى كۇنىندە ءبىزدى قانشا قازاقستاندىق قولداپ، «#وتباسى» حەشتەگىنىڭ قانشالىقتى كەڭ تاراعانىن كورە الامىز»، - دەدى ايدا بالايەۆا.
