مەدەۋ پاركىندەگى جەر ۋچاسكەلەرى ءۇشىنشى تۇلعالاردىڭ پايداسى ءۇشىن يەلىكتەن شىعارىلعان

استانا. قازاقپارات - «مەدەۋ» تابيعي پاركىنىڭ اۋماعىنداعى جەر ۋچاسكەلەرىن ءۇشىنشى تۇلعالاردىڭ پايداسىنا يەلىكتەن شىعارۋ فاكتىلەرى انىقتالدى.

بۇل تۋرالى سەنات دەپۋتاتتارىنىڭ ساۋالىنا باس پروكۋرور بەرىك اسىلوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.

«الماتى قالاسى اكىمدىگىنىڭ جۇمىسىنداعى كەمشىلىكتەردىڭ ءبىرى - قالا قۇرىلىسىن جوسپارلاۋدىڭ ءتيىمسىز جۇيەسى. اتاپ ايتقاندا، قالانىڭ باس جوسپارى 2004 -جىلى قابىلدانعان جانە بۇگىنگى كۇنگى شىندىققا (دەموگرافيانى، حالىقتى جىلۋمەن جابدىقتاۋدى، ەكولوگيالىق تالاپتاردى جانە ت. ب. ەسكەرمەگەن) سايكەس كەلمەيدى. سونىمەن قاتار ولاردا سەيسمولوگيالىق قاۋىپ-قاتەرلەر (تاماق قابىلداۋ پۋنكتتەرى، جەر سىلكىنىسى كەزىندە قاۋىپسىز ورىندار، تاۋلارعا جاقىن جانارماي قۇيۋ بەكەتتەرى جانە ت. ب.) كوزدەلمەگەن. ءوڭىردىڭ جەرگىلىكتى اتقارۋشى ورگاندارىنىڭ باس جوسپاردى جانە ەگجەي- تەگجەيلى جوسپارلاۋ جوبالارىن ساقتاماۋى تاعى ءبىر جۇيەلى بۇزۋشىلىق سانالادى. پروكۋرورلار الماتى قالاسىندا جانە قالا ماڭىنداعى ايماقتاردا (الماتى وبلىسىنىڭ اۋماعى) باس جوسپاردى بۇزا وتىرىپ، جەر ۋچاسكەلەرىنىڭ نىسانالى ماقساتىن زاڭسىز وزگەرتۋدىڭ جانە ەگجەي- تەگجەيلى جوسپارلاۋ جوبالارى تۇزەتۋلەرىنىڭ 100 دەن استام فاكتىسىن انىقتادى»، - دەپ اتاپ وتەدى باس پروكۋرور جاۋابىندا.

ونىڭ دەرەگىنشە، تۇركيادا ورىن العان وقيعالار اياسىندا قالا پروكۋرورىنىڭ نارازىلىقتارى بويىنشا تاۋلى جەرلەردە 120 ۋچاسكەنىڭ (250 گەكتار) زاڭسىز سالىنۋىنا جول بەرىلمەدى.

«سونداي-اق «مەدەۋ» تابيعي پاركىنىڭ اۋماعىنداعى جەر ۋچاسكەلەرىن (45 گەكتار) ءۇشىنشى تۇلعالاردىڭ پايداسىنا يەلىكتەن شىعارۋ فاكتىلەرى انىقتالدى. اتالعان بۇزۋشىلىقتار بويىنشا الماتى قالاسىنىڭ پروكۋراتۋراسى جەرگە رۇقسات بەرۋ قۇجاتتارىنىڭ كۇشىن جويۋ تۋرالى 10 تالاپ قويۋ ەنگىزدى. قاداعالاۋ ءىس-شارالارى بويىنشا ەگجەي-تەگجەيلى تۇگەندەۋ جۇرگىزۋ ارقىلى اۋدانى 13 گەكتار (جايلاۋ شاعىن اۋدانى) تاۋلى جەرلەردە جەكە تۇرعىن ءۇي قۇرىلىسىنا بولىنگەن جەر پايدالانۋ قۇقىعىنا ارنالعان مەملەكەتتىك اكتىلەردىڭ كۇشى جويىلدى»، - دەدى بەرىك اسىلوۆ.