پارلامەنت ەلەكتر ساموكاتتىڭ جولداعى جىلدامدىعىنا قاتىستى زاڭدى قابىلدادى

استانا. قازاقپارات - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسىن ۇيىمداستىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى.

قۇجات اياسىندا ەلەكتر ساموكاتتارمەن جولدا ءجۇرۋ ءتارتىبى رەتتەلەدى، دەپ حابارلايدى قازاقپارات ءتىلشىسى.

اتالعان زاڭ جوباسىن پارلامەنت دەپۋتاتتارى ازىرلەدى.

«كەيىنگى كوشەدە جاڭا كولىك قۇرالدارىنىڭ، ياعني ەلەكتر ساموكاتتاردىڭ، گيروسكۋتەرلەر مەن مونودوڭگەلەكتەردىڭ جانە باسقا دا تۇرلەرى پايدا بولعانىن كورىپ ءجۇرمىز. بىزگە ازاماتتاردان جاڭا كولىك قۇرالدارىنىڭ ءجۇرىسىن رەتتەۋ ماسەلەلەرى بويىنشا وتىنىشتەر ۇنەمى ءتۇسىپ جاتادى. اسىرەسە، بۇل جاعداي مەگاپوليستەرگە قاتىستى. ەلەكتر ساموكاتتاردىڭ جولدارمەن جانە تروتۋارلارمەن ءجۇرۋى جاياۋ جۇرگىنشىلەر مەن جۇرگىزۋشىلەرگە ءقاۋىپ ءتوندىرىپ جاتىر»، - دەدى ءماجىلىس دەپۋتاتى ەكاتەرينا سمىشليايەۆا.

ونىڭ ايتۋىنشا، وسى زاڭ جوباسى ەكى جىل بۇرىن ازىرلەنگەن. الايدا ەلەكتر ساموكاتتارعا قاتىستى تەحنيكالىق رەگلامەنت تەك 2022 -جىلدىڭ شىلدەسىندە قابىلداندى.

«بۇگىن ءبىز ەلەكتر ساموكاتتاردىڭ ءجۇرىسىن رەتتەۋ بويىنشا العاشقى تۇزەتۋلەر توپتاماسىن ۇسىنىپ وتىرمىز. جوباعا سايكەس ەلەكتر ساموكاتتار كولىك قۇرالى رەتىندە تانىلادى، سونداي- اق ءجۇرۋ جىلدامدىعى ساعاتىنا 25 كيلومەترگە دەيىنگى كولىك قۇرالدارى ەلەكتر ساموكات ساناتىنا جاتادى. ەلەكتر ساموكاتتار ۆەلوسيپەد جولدارى مەن جول جيەكتەرىندە شەكتەۋسىز جۇرە الادى. تروتۋارلاردا ساعاتىنا 6 كيلومەتردەن اسپايتىن جىلدامدىقپەن جۇرۋگە رۇقسات ەتىلەدى. بۇل ءتاسىل كولىكتىڭ جاڭا ءتۇرىن پايدالاناتىندار مەن جاياۋ جۇرگىنشىلەر ءۇشىن ەڭ قولايلى شەشىم»، - دەدى دەپۋتات.

ونىڭ پايىمىنشا، تروتۋارداعى جىلدامدىقتى شەكتەۋ - جاياۋ جۇرگىنشىلەردىڭ قاۋىپسىزدىگىن قامتاماسىز ەتەدى.

«شەكتەۋلەردى قاداعالاۋ قيىن. ءبىراق مۇنداي جىلدامدىق شامامەن جاياۋ جۇرگىنشىلەر لەگىنىڭ جىلدامدىعىنا تەڭ. بۇل جىلدامدىق سىرتتاي كوزبەن شولىپ انىقتالادى. ەلەكتر ساموكاتتىڭ جولدىڭ ءجۇرۋ بولىگىنىڭ وڭ جاق شەتىمەن، ونىڭ ىشىندە اۆتوبۋس جولاعىمەن ءبىر قاتاردا جۇرۋىنە جول بەرىلەدى. الايدا، بۇل ءۇشىن جۇرگىزۋشى 18 جاسقا تولۋى جانە شلەم كيۋى كەرەك. سونداي- اق ونىڭ ۇستىندە جارىق شاعىلىستىراتىن كيىم مەن كەز كەلگەن ساناتتاعى جۇرگىزۋشى كۋالىگى بولۋى قاجەت»، - دەدى ەكاتەرينا سمىشليايەۆا.

بۇدان بۇرىن حابارلانعانداي، ق ر ىشكى ىستەر ءمينيسترى مارات احمەتجانوۆ ەلەكتر ساموكاتپەن جولدا ءجۇرۋ تارتىبىنە قاتىستى تۇسىنىك بەردى.