تۋريست ورماندا جالعىز ءوزى بەس كۇن بويى اداسىپ، ءبىر زاتتىڭ ارقاسىندا امان قالعان - ۆيدەو

استانا. قازاقپارات - تۋريست ايەل اۋستراليا ورمانىندا جالعىز قالىپ، بەس كۇن بويى كولىگىنەن كەزدەيسوق تاۋىپ العان ءبىر زاتتىڭ ارقاسىندا امان قالعان، - دەپ حابارلايدى Tengritravel.kz ءتىلشىسى The Washington Post باسىلىمىنا سىلتەمە جاساپ.

48 جاستاعى ليليان يپ اۋستراليانىڭ ۆيكتوريا شتاتىنىڭ وڭتۇستىك-شىعىس بولىگىندەگى برايت قالاسىنا بارعان، ول ءساۋىردىڭ اياعىندا ۆيكتوريالىق ءالپى بوكتەرىندە ءبىر كۇن دەمالۋدى جوسپارلاعان. الايدا ول بايلانىسقا شىقپاي قالىپ، تۋعان-تۋىستارىن ابدەن الاڭداتقان. جاقىندارى دەرەۋ پوليتسياعا حابارلاعان. بەس كۇن وتكەندە ۇشاقتاعى قۇتقارۋشىلار ايەلدىڭ كولىگىن توپىراقتى جولدان بايقاعان. ايەل قۇتقارۋشىلاردى بايقاپ، قول سەرمەگەن.

قۇتقارىلعان يپتىڭ ايتۋىنشا، ول اداسىپ كەتكەن جانە كولىگىن ءوزى كەلگەن جولعا قايتا بۇرماق بولعاندا باتپاقتا تۇرىپ قالعان. بۇل ايماقتا بايلانىس بولماعان، سول سەبەپتى ول كومەك كۇتۋدى ءجون كورگەن. ايەل وزىمەن ازداعان تاعام العان، الايدا سۋ الماي شىققان ەكەن. سوسىن ول كولىگىندە اناسىنا سىيلىق رەتىندە العان شاراپ بارىن ەسىنە تۇسىرگەن. ايەلدىڭ ايتۋىنشا، ومىردە ىشىمدىك ىشپەيدى، ءبىراق بۇل جولى ءدال سول الكوگولدىڭ ارقاسىندا امان قالعان.