قىرعىزستاندا تالعات بيگەلدينوۆتى ەسكە الۋ شاراسى ءوتتى - فوتو
قازاقستاننىڭ قىرعىزستان رەسپۋبليكاسىنداعى ەلشىلىگىنىڭ قىزمەتكەرلەرى مەن ولاردىڭ وتباسى مۇشەلەرى، قىرعىزستان حالقى اسسامبلەياسى مەن قىرعىزستانداعى قازاقتار قاۋىمداستىعىنىڭ وكىلدەرى قازاقتىڭ اتى اڭىزعا اينالعان ۇشقىشى تالعات بيگەلدينوۆتىڭ مۇسىنىنە گۇل شوقتارىن قويىپ، ەكىنشى دۇنيەجۇزىلىك سوعىسقا قاتىسۋشىلارعا تاعزىم ەتتى.
بەلگىلى ۇشقىشتىڭ بالالىق جانە جاستىق شاعى بىشكەك قالاسىندا ءوتتى. تالعات بيگەلدينوۆ 16 جاسىندا بىشكەكتەگى اەروكلۋبقا وقۋعا ءتۇستى. 1940 -جىلى قىزىل ارميا قاتارىنا الىنىپ، اۋەلى بالاشوۆ اتىنداعى اسكەري اۆياتسيا ۋچيليشەسىنە وقۋعا ءتۇسىپ، ودان چكالوۆ اسكەري اۆياتسيا ۋچيليشەسىنە اۋىستىرىلدى، ونى 1942 -جىلى ءبىتىردى.
العاشقى كەڭەس وداعىنىڭ باتىرى اتاعى اعا لەيتەنانت ت. بيگەلدينوۆكە 1944 -جىلدىڭ قازان ايىندا مايداندا جانە تىلداعى ەرلىگى مەن جاۋىنگەرلىك شەبەرلىگى ءۇشىن، سونداي- اق اۋە شايقاستارىندا جاۋدىڭ ءتورت ۇشاعىن جەكە ءوزى اتىپ تۇسىرگەنى ءۇشىن بەرىلدى.
1945 -جىلى 27 ماۋسىمدا ەسكادريليانى شەبەر باسقارعانى جانە كراكوۆ، وپپەلن، كاتوۆيتسە، برەسلاۋ جانە بەرليندە جاۋ اسكەرى مەن تەحنيكاسىن جيناقتاۋعا قارسى شابۋىل كەزىندە كورسەتكەن جاۋىنگەرلىك ەرلىگى ءۇشىن تالعات بيگەلدينوۆكە ەكىنشى رەت كەڭەس وداعىنىڭ باتىرى اتاعى بەرىلدى.
