ق ر پرەزيدەنتى ەكى مايدانگەرگە «حالىق قاھارمانى» اتاعىن بەردى

استانا. قازاقپارات - پرەزيدەنت قاسىم- جومارت توقايەۆ سوعىس ارداگەرلەرى ءابدىعالي قايمولدين مەن يۆان گاپيچكە «حالىق قاھارمانى» اتاعىن بەرىپ، ولاردى ايرىقشا ەرەكشەلىك بەلگىسى - التىن جۇلدىز بەن «وتان» وردەنىمەن ماراپاتتادى، دەپ حابارلايدى قازاقپارات اقورداعا سىلتەمە جاساپ.

مەملەكەت باسشىسىنىڭ جارلىعىمەن 1941- 1945 -جىلدارداعى وتان سوعىسىندا كورسەتكەن ەرلىگى، باتىلدىعى، جانقيارلىعى مەن سوعىستان كەيىن مەملەكەتتىك جانە قوعامدىق قىزمەتكە بەلسەندى قاتىسقانى ءۇشىن ءابدىعالي قايمولدينگە «حالىق قاھارمانى» اتاعى بەرىلىپ، ايرىقشا ەرەكشەلىك بەلگىسى - التىن جۇلدىز بەن «وتان» وردەنى تاپسىرىلدى.

سونداي- اق، مەملەكەت باسشىسىنىڭ جارلىعىمەن 1941- 1945 -جىلدارداعى وتان سوعىسىندا كورسەتكەن ەرلىگى مەن جانقيارلىعى ءۇشىن جەڭىس پارادىنىڭ قاتىسۋشىسى يۆان ستەپانوۆيچ گاپيچكە«حالىق قاھارمانى» اتاعى بەرىلىپ، ايرىقشا ەرەكشەلىك بەلگىسى - التىن جۇلدىز بەن «وتان» وردەنى تاپسىرىلدى.

قايمولدين ءابدىعالي - وتان سوعىسى جانە ەڭبەك ارداگەرى

1921 -جىلى 30- ماۋسىمدا سەمەي وبلىسى ابىرالى اۋدانى ۇزىنبۇلاق اۋىلىندا دۇنيەگە كەلگەن.

1941 -جىلى اسكەر قاتارىنا شاقىرىلدى. 1941-1945 -جىلدىڭ 9 -مامىرى ارالىعىندا ستالينگراد، 1-ۋكراينا، 1-بەلارۋس، 3-بالتىق مايداندارىندا شايقاستى. 1946 -جىلدىڭ ماۋسىم ايىندا اسكەر قاتارىنان بوساتىلعان.

اتالعان قىزمەتتەن كەيىن پارتيادا جانە مەملەكەتتىك ورگانداردا جۇمىس ىستەدى. اۋەلى ك و ك پ سەمەي وبلىستىق كوميتەتىندە، سودان كەيىن جاڭاسەمەي، نوۆوپوكروۆسك اۋداندارىنىڭ اتقارۋ كوميتەتىندە ەڭبەك ەتتى. 1977-1982 -جىلدارى «تۇركسىب» سوۆحوزى پارتيا كوميتەتىنىڭ حاتشىسى بولىپ جۇمىس ىستەدى جانە وسى جەردەن قۇرمەتتى دەمالىسقا شىقتى.

قىزىل جۇلدىز جانە 1 -دارەجەلى وتان سوعىسى وردەندەرىمەن، «جاۋىنگەرلىك ەڭبەگى ءۇشىن»، «كەنيگسبەرگتى العانى ءۇشىن»، «گەرمانيانى جەڭگەنى ءۇشىن» مەدالدارىمەن ماراپاتتالعان.

گاپيچ يۆان ستەپانوۆيچ - وتان سوعىسى جانە ەڭبەك ارداگەرى

1923 -جىلى 2 اقپاندا اقمولا قالاسىندا دۇنيەگە كەلگەن.

پولشانى، چەحوسلوۆاكيانى، ۋكراينانى ازات ەتۋگە قاتىستى. بۇكىل سوعىستى باستان وتكەرگەن مايدانگەر فاشيستەردىڭ گارنيزوندارى مەن كومەنداتۋرالارىن تالقانداعان، وق- ءدارى جانە ازىق- تۇلىك قويمالارىن جويعان وتريادتىڭ جاۋىنگەرلىك وپەراتسيالارىنا قاتىسقان.

قىزىل جۇلدىز جانە Ⅲ دارەجەلى داڭق وردەندەرىمەن، «ەرلىگى ءۇشىن»، «جاۋىنگەرلىك ەڭبەگى ءۇشىن»، «كەنيگسبەرگتى العانى ءۇشىن»، «گەرمانيانى جەڭگەنى ءۇشىن» مەدالدارىمەن، «پروكۋراتۋرانىڭ قۇرمەتتى قىزمەتكەرى» توسبەلگىسىمەن، 1، 2، 3 -دارەجەلى «ەرەن ەڭبەگى ءۇشىن» مەدالدارىمەن، «قۇرمەت» وردەنىمەن، Ⅱدارەجەلى «داڭق» وردەنىمەن ماراپاتتالعان. باتىس قازاقستان وبلىسىنىڭ قۇرمەتتى ازاماتى.

1945 -جىلى 24 -ماۋسىمدا قىزىل الاڭدا وتكەن جەڭىس پارادىنىڭ قاتىسۋشىسى.