توقايەۆ سوعىس جىلدارىندا قازا تاپقان جاۋىنگەرلەردىڭ رۋحىنا تاعزىم ەتتى

استانا. قازاقپارات - مەملەكەت باسشىسى قاسىم- جومارت توقايەۆ استانادا «وتان انا» مونۋمەنتىنە گۇل شوعىن قويۋ راسىمىنە قاتىستى. قازاقپارات بۇل تۋرالى اقورداعا سىلتەمە جاساپ حابارلايدى.

پرەزيدەنت ەلورداداعى «وتان انا» مونۋمەنتىنە گۇل شوعىن قويىپ، ۇلى وتان سوعىسى جىلدارىندا قازا تاپقان جاۋىنگەرلەرىمىزدىڭ رۋحىنا تاعزىم ەتتى.

سودان كەيىن پرەزيدەنتتىك وركەستر مەملەكەتتىك ءانۇراندى ورىنداپ، قۇرمەت قاراۋىلى روتاسى شاراعا قاتىسۋشىلاردىڭ الدىنان ساپ تۇزەپ ءوتتى.

شارا سوڭىندا قاسىم- جومارت توقايەۆ ارداگەرلەرمەن اڭگىمەلەستى. پرەزيدەنت ولاردى جەڭىس كۇنىمەن قۇتتىقتاپ، بارشا وتانداسىمىزعا زور دەنساۋلىق، اماندىق تىلەدى.

ەسكە سالايىق، بۇگىن مەملەكەت باشىسى «وتان انا» مونۋمەنتىنە گۇل شوعىن قويۋ راسىمىنە قاتىساتىنىن جازعان بولاتىنبىز.