قۇراستىرىلعان اۆتوكولىكتەردى زاڭداستىرۋعا رۇقسات ەتىلدى - ۇكىمەت قاۋلىسى

استانا. قازاقپارات - ۇكىمەت ەلگە اكەلىنگەن كونسترۋكتور-اۆتوكولىكتەردى زاڭداستىرۋعا جانە باستاپقى تىركەۋدى جۇزەگە اسىرۋعا مۇمكىندىك بەرەتىن ءتيىستى ەرەجەلەرگە وزگەرىستەر ەنگىزدى، دەپ حابارلايدى قازاقپارات ۇكىمەتتىڭ رەسمي سايتىنا سىلتەمە جاساپ.

جىل باسىنان بەرى مەملەكەت باسشىسىنىڭ تاپسىرماسىن ورىنداۋ اياسىندا قازاقستاندىقتارعا 2022 -جىلعى 1-قىركۇيەككە دەيىن قازاقستانعا اكەلىنگەن شەتەلدىك اۆتوكولىكتەردى زاڭداستىرۋعا مۇمكىندىك بەرىلدى. ال، بۇعان دەيىن ەلگە قوسالقى بولشەكتەر رەتىندە اكەلىنگەن كولىك يەلەرى رەسمي تىركەۋ قۇجاتتارىنىڭ جوقتىعىنان قيىندىقتارعا تاپ بولدى.

ۇكىمەت بۇل ماسەلەنى شەشۋ ءۇشىن ازاماتتارعا كونسترۋكتور-اۆتوكولىكتەردى زاڭداستىرۋعا جانە باستاپقى تىركەۋدى جۇزەگە اسىرۋعا مۇمكىندىك بەرەتىن ءتيىستى ەرەجەلەرگە وزگەرىستەر ەنگىزدى.

مۇنداي كولىك قۇرالدارىن باستاپقى تىركەۋ ءۇشىن الىم مولشەرلەمەسى - 200 مىڭ تەڭگە. تىركەلۋ ءۇشىن:

1) ءوتىنىش؛

2) ىشكى ىستەر ورگاندارىنىڭ ۋاكىلەتتى قىزمەتكەرى بەرگەن كولىك قۇرالىن تەكسەرىپ- قاراۋ اكتىسى؛

3) تەحنيكالىق تەكسەرىپ-قاراۋدىڭ دياگنوستيكالىق كارتاسى بولۋى قاجەت.

اۆتوكولىكتەردى زاڭداستىرۋ ءۇشىن وتىنىمدەردى Egov قىزمەتتەرى جانە ەكىنشى دەڭگەيلى بانكتەردىڭ موبيلدى قوسىمشالارى ارقىلى بەرۋگە بولادى.

ايتا كەتۋ كەرەك، ەلگە قوسالقى بولشەكتەر تۇرىمەن اكەلىنگەن جانە كەدەندىك تازارتۋدان وتپەگەن اۆتوكولىكتى تىركەۋ كۋالىگىندە مەنشىك قۇقىعىن وزگەرتۋگە تىيىم سالۋ جانە تەك قر اۋماعىندا پايدالانۋعا رۇقسات بەرۋ تۋرالى جازبا كورسەتىلەدى.

ق ر ىشكى ىستەر مينيسترلىگىنىڭ مالىمەتىنشە، اكتسيا باستالعالى رەسپۋبليكا بويىنشا 107 مىڭنان استام كولىك زاڭداستىرىلعان. سونىمەن قاتار، 14 مىڭعا جۋىق كونسترۋكتور-اۆتوكولىك انىقتالعان.