تۇركىستان وبلىسىندا قاتتى داۋىلدان ءالى ەكى اۋدان تۇرعىندارى جارىقسىز وتىر
وبلىستىق توتەنشە جاعدايلار دەپارتامەنتىنىڭ مالىمەتىنشە، بايدىبەك پەن ساۋران اۋداندارىندا ەكى مىڭنان اسا ابونەنت ەلەكتر جەلىسىنە قوسىلمادى، دەپ حابارلايدى قازاقپارات ءتىلشىسى.
ەلەكتر جەلىلەرىن جوندەۋ جۇمىستارىنا «وڭتۇستىك جارىق» مەكەمەسىنىڭ 6 بريگاداسى - 48 ادام مەن 4 تەحنيكاسى جۇمىلدىرىلعان.
سايرام، ساۋران، بايدىبەك، وتىرار، ورداباسى، تولەبي، تۇلكىباس، سوزاق اۋداندارى مەن تۇركىستان، كەنتاۋ، ارىس قالالارىندا جەلدىڭ ەكپىنى ءالى باسىلار ەمەس.
وبلىستىق ت ج د-دا ارنايى شتاب قۇرىلىپ، ارنايى كوميسسيا جۇمىسقا كىرىستى. ايماقتاعى سۋ نىساندارى مەن قويمالارىندا تاۋلىكتىك كەزەكشىلىك جۇرگىزىلىپ، باقىلاۋعا الىنعان.
تابيعاتتىڭ توسىن مىنەزىنە بايلانىستى كەنتاۋ قالاسىنداعى بارلىق ءبىلىم وشاقتارى قاشىقتان وقىتۋعا كوشىرىلىپ، بالاباقشالار ۋاقىتشا جۇمىسىن توقتاتتى. بازارلار مەن ساۋدا ورتالىقتارىنىڭ جانە حالىق كوپ شوعىرلاناتىن نىسانداردىڭ جۇمىسىنا شەكتەۋ قويىلدى. اۋدان، قالالاردىڭ كوممۋنالدىق قىزمەتى كۇشەيتىلگەن رەجيمدە جۇمىس ىستەۋگە كوشكەن.
