ءاليحان سمايىلوۆ تاجىكستان پرەزيدەنتىمەن كەزدەستى

استانا. قازاقپارات - استانادا قازاقستان پرەمەر- ءمينيسترى ءاليحان سمايىلوۆ پەن ەلىمىزگە مەملەكەتتىك ساپارمەن كەلگەن تاجىكستان پرەزيدەنتى ەمومالي راحموننىڭ كەزدەسۋى ءوتتى، دەپ حابارلايدى قازاقپارات ۇكىمەتتىڭ رەسمي سايتىنا سىلتەمە جاساپ.

تاراپتار ەكىجاقتى ىنتىماقتاستىقتىڭ، ونىڭ ىشىندە ساۋدا، ونەركاسىپ، اۋىل شارۋاشىلىعى، ينۆەستيتسيالىق قىزمەت، سونداي- اق كولىك- لوگيستيكا جانە سۋ- ەنەرگەتيكا سالالارىنداعى ءوزارا ءىس- قيمىلدىڭ كەڭ اۋقىمدى ماسەلەلەرىن تالقىلادى.

پرەمەر- مينيستر تاجىكستان قازاقستاننىڭ ايماقتاعى ماڭىزدى ساۋدا- ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى. ماسەلەن، وتكەن جىلدىڭ قورىتىندىسى بويىنشا ەكىجاقتى تاۋار اينالىمى %19 عا ءوسىپ، $1,4 ميللياردقا جەتتى.

«ءبىز ءوزارا ساۋدانى ودان ءارى كەڭەيتۋ ءۇشىن ايتارلىقتاي الەۋەتتى كورىپ وتىرمىز. تاۋار اينالىمىن $2 ميللياردقا جەتكىزۋ جونىندەگى العا قويعان مىندەتىمىزگە سايكەس ءبىز تاجىكستان ۇكىمەتىمەن بىرلەسىپ ساۋدا- ەكونوميكالىق قارىم- قاتىناستى كەڭەيتۋ بويىنشا جۇمىس ىستەپ جاتىرمىز»، — دەدى ءاليحان سمايىلوۆ.

پرەمەر- مينيستر اتاپ وتكەندەي، بۇل باعىتتا ەكونوميكالىق ىنتىماقتاستىق جونىندەگى قازاقستان- تاجىكستان ۇكىمەتارالىق كوميسسياسى ماڭىزدى ءرول اتقارادى، ونىڭ كەزەكتى وتىرىسى وسى جىلدىڭ ءساۋىر ايىندا ءساتتى وتكەن بولاتىن. سونىمەن قاتار 2023-2024 -جىلدارعا ارنالعان تاۋار اينالىمىن ارتتىرۋ بويىنشا جول كارتاسى قابىلداندى.

سونداي- اق ءاليحان سمايىلوۆ 3-مامىردا كوپتەگەن كاسىپورىنداردىڭ وكىلدەرى قاتىسقان بىرلەسكەن بيزنەس- فورۋم ەكى ەلدىڭ بيزنەس- قاۋىمداستىقتارىنىڭ جاقىنداسۋىنا سەپتىگىن تيگىزگەنىن ايتتى. ناتيجەسىندە جالپى قۇنى $20 ميلليوندى قۇرايتىن ءبىرقاتار ماڭىزدى كوممەرتسيالىق قۇجاتتارعا قول قويىلدى.

«قازاقستان رەسپۋبليكاسىنىڭ ۇكىمەتى تاجىكستان رەسپۋبليكاسىمەن ساۋدا- ەكونوميكالىق ىنتىماقتاستىقتى كەڭەيتۋ ءۇشىن بار كۇش- جىگەرىن سالادى. بيىل قازاق- تاجىك ىنتىماقتاستىعىنىڭ جوعارى قارقىنى بارلىق باعىتتار بويىنشا داميتىنىنا سەنىمدىمىن»، - دەدى پرەمەر- مينيستر.

ءوز كەزەگىندە تاجىكستان پرەزيدەنتى ەمومالي راحمون رەسپۋبليكالار اراسىنداعى ستراتەگيالىق ارىپتەستىكتى ودان ءارى نىعايتۋدىڭ جوعارى الەۋەتىن اتاپ ءوتتى.

«ءبىزدىڭ قارىم- قاتىناسىمىزدى دامىتۋ ءۇشىن قاجەتتى العىشارتتار بار. بارلىق نەگىزگى باعىتتاردا ءوزارا ءتيىمدى ءىس- قيمىلدىڭ باي تاجىريبەسى جيناقتالدى. مەن بۇگىن قابىلدانعان وداقتاستاردىڭ ءوزارا ءىس- قيمىلى تۋرالى دەكلاراتسيانىڭ تاريحي ماڭىزىن ەرەكشە اتاپ وتكىم كەلەدى. بۇل ءبىزدىڭ ىنتىماقتاستىعىمىزدى نىعايتۋعا كەڭ جول اشادى»، — دەدى ەمومالي راحمون.

تاجىكستان باسشىسى ەكى ەلدىڭ بيزنەس- قاۋىمداستىقتارىن جاقىنداستىرۋدىڭ، ەكىجاقتى ساۋدانى ارتتىرۋدىڭ جانە ءوزارا مادەني- گۋمانيتارلىق ءىس- قيمىلدى جانداندىرۋدىڭ ماڭىزدىلىعىن اتاپ ءوتتى.

«ءبىز قازاقستانمەن ەشبىر شەكتەۋسىز بارلىق سالادا ىنتىماقتاسۋعا دايىنبىز»، — دەدى ەمومالي راحمون.