ايتجانوۆ تاشكەنتتە قازاق بوكسشىنى «اياقتان شالعانىنا» قاتىستى ويىن ايتتى

استانا. قازاقپارات - بوكستان قازاقستان قۇراماسىنىڭ باس باپكەرى مىرزاعالي ايتجانوۆ تاشكەنتتەگى الەم چەمپيوناتىندا تالعات سىرىمبەتوۆتىڭ داۋلى جەڭىلىسىنە قاتىستى ويىن ايتتى، دەپ حابارلايدى Bassport.kz.
None

قازاقستان قۇراماسىنا العاش قوسىلعان تالعات 60 كەلىدەگى 1/16 فينالدا تورەشىلەردىڭ بولەك شەشىمىمەن ازيا چەمپيونى، يوردانيالىق موحامەد ءابۋ-دجادجەحكە ەسە جىبەردى.

«الەم چەمپيوناتى بولعان سوڭ، بارلىق جەكپە-جەك تارتىستى وتەدى. قارسىلاستاردىڭ ءبارى دە مىقتى دايىندىقپەن كەلگەن، ولاردان ۇنەمى ءبىر ساتى جوعارى بولۋ قيىن. تالعاتتىڭ قارسىلاسى دا وسال ەمەس. 2022-جىلعى ازيا چەمپيونى اتانعان سپورتشى. كەزدەسۋ وڭاي بولعان جوق، ءبىراق ءبىز بوكسشىمىزعا ريزامىز. بارىن سالدى، ايانعان جوق. ءبىزدىڭ تاپسىرمامىزدى شاما كەلگەنشە ورىندادى. ءوزىم دە ونى جەڭىلدى دەپ ويلامايمىن. ءبىراق تورەشى قارسىلاستىڭ قولىن كوتەرگەن سوڭ، جەڭىلىسكە كونۋگە تۋرا كەلەدى. امال جوق.

ءۇشىنشى راۋندتا بۇدان دا جاقسى جۇدىرىقتاسۋعا بولاتىن ەدى. سىرىمبەتوۆكە تاجىريبە جەتپەدى. ول باسقا بوكسشىلارىمىز سەكىلدى ەكىنشى نەمەسە ءۇشىنشى الەم چەمپيوناتىنا قاتىسىپ جاتقان جوق. الەم بىرىنشىلىگىنە العاش رەت كەلىپ وتىر. سول تاجىريبەنىڭ ازدىعىنان، جەڭىسكە دەگەن قۇشتارلىعىنىڭ تىم قاتتى بولۋىنان باسسىز العا كەتكەن كەزدەرى بولدى. سونداي ساتتەردە، اشىق توبەلەسكە كەتكەندە سوققى جىبەرىپ الادى. جەڭىسكە دەگەن اسقان قۇشتارلىقتىڭ كەرى اسەرى دە بولاتىنىن ۇمىتپاۋ كەرەك.

تالعات ءارى شىڭدالادى، ىسىلادى، تاجىريبە جينايدى. وعان ريزامىز. ال شاعىم تۇسىرۋگە كەلەتىن بولساق، اپپەلياتسيانى كەز-كەلگەن كەزدەسۋدەن سوڭ قابىلداي بەرمەيدى. ەسەپ 2:3 بولعاندا نەمەسە تىم قاتتى كۇماندى جاعدايلار تىركەلگەندە عانا قابىلايدى»، - دەدى مىرزاعالي ايتجانوۆ.


سوڭعى جاڭالىقتار