الەم چەمپيوناتىندا وزگە ەلدىڭ نامىسىن قورعايتىن قازاق بوكسشىلارى كىم

استانا. قازاقپارات - بوكستان تاشكەنتتە ءوتىپ جاتقان الەم چەمپيوناتىنا قازاقستان قۇراماسىنان بولەك، وزگە ەلدەردىڭ نامىسىن قورعايتىن ەتنيكالىق قازاقتار دا قاتىسىپ جاتىر، دەپ حابارلايدى قازاقپارات.

رۋسلان ابدۋللايەۆ، وزبەكستان

وزبەكستاندا ومىرگە كەلگەن قازاق بوكسشىسىن جەرگىلىكتى جانكۇيەر جاقسى تانيدى. ابدۋللايەۆ 2019-جىلى قازاقستانعا كەلىپ، ەل چەمپيوناتىنا قاتىسقان بولاتىن. ءبىراق جارتىلاي فينالدا سابىرجان اققالىقوۆقا ەسە جىبەردى. سودان سوڭ ۇلتتىق قۇراماعا ىلىكپەگەن رۋسلان وزبەكستانعا قايتا ورالىپ، 2021-جىلى كورشى ەل چەمپيوناتىندا توپ جاردى. ودان بولەك، وزبەكستاننىڭ ۇزدىك بوكسشىسى اتاعىن دا يەلەندى.

ابدۋللايەۆ 2022-جىلعى ازيا چەمپيوناتىنىڭ التىن جۇلدەگەرى. سول سىندا ول قازاق بوكسشىسى ءساناتالى تولتايەۆتى سەنىمدى ۇتىپ، سارى قۇرلىقتا قارسىلاس شىداتپاعان بولاتىن.

تاشكەنتتەگى الەم بىرىنشىلىگىن ابدۋللايەۆ وتە جاقسى باستاپ، پۋەرتو-ريكو سپورتشىسىن ەش قيىندىقسىز ۇتتى. وزبەكستانداعى قازاق بوكسشىسى 63,5 كەلىدە چەمپيوندىق اتاققا باستى ۇمىتكەرلەردىڭ ءبىرى.

ازات ماحمەتوۆ، باحرەين

قازاقستان قۇراماسىندا ۇزاق جىلدار بويى تەر توككەن ازات ماحمەتوۆ بىلتىردان بەرى باحرەين تۋى استىندا سىنعا تۇسۋدە. 51 كەلىگە دەيىنگى سالماقتا باق سىنايتىن ماحمەتوۆتىڭ ەلىمىزدەگى باسەكەلەستىككە توتەپ بەرە الماعانى انىق. سەبەبى بۇل سالماقتا الەم چەمپيونى، وليمپيادا ويىندارىنىڭ جۇلدەگەرى ساكەن بيبوسىنوۆ بار.

ازاتتىڭ ازاماتتىق اۋىستىرۋىنا قازاقستان بوكس فەدەراتسياسى دا قارسى بولعان جوق. «ازاتتىڭ بۇل وتىنىشىنە تۇسىنىستىكپەن قارادىق. ازات تالانتتى ءارى تاجىريبەلى بوكسشى. باحرەين قۇراماسىندا وعان تەك ساتتىلىك تىلەيمىز. بۇل ازىرگە كومانداعا تۇسكەن جالعىز ءوتىنىش. ودان بولەك، ۇلتتىق قۇراما اۋىستىرۋ نيەتىندە جۇرگەن بوكسشىلار جوق»، - دەگەن بولاتىن قازاقستان بوكس فەدەراتسياسىنىڭ اتقارۋشى ديرەكتورى ماراتبەك مىقتىبەكوۆ.

ازات ماحمەتوۆ باحرەين ساپىندا امماندا وتكەن ازيا بىرىنشىلىگىنە قاتىسىپ، العاشقى جەكپە-جەكتە جاپونيالىق الەم چەمپيونى تومويا تسۋبويدان ۇتىلدى.

توقتاربەك تاڭاتحان، قىتاي

بوكستان قىتاي چەمپيونى توقتاربەك توكيو وليمپياداسىندا باق سىناپ ۇلگەردى. ول اتالعان سىندا 75 كەلىگە دەيىنگى سالماقتا ونەر كورسەتتى. ال وليمپياداعا جولداما بەرەتىن اممانداعى ىرىكتەۋ تۋرنيرىندە ءابىلحان امانقۇلدان ۇتىلعان بولاتىن. جاپونياداعى ءتورتجىلدىق دوداسىندا توقتاربەك پەن ءابىلحاننىڭ جولىن بولاشاق چەمپيون، برازيليالىق ەبەرت كونسەيسان سوۋزا كەسكەن ەدى. ەكەۋى دە وليمپيادا جەڭىمپازىنان ۇتىلدى.

قازىرگى تاڭدا توقتاربەك كاسىبي بوكستا دا باق سىناپ ءجۇر. بۇگىندە ول 80 كەلىگە دەيىنگى سالماق دارەجەسىنە اۋىسىپ، تاشكەنتتەگى العاشقى جەكپە-جەگىندە ارمەنيالىق حامباردزۋن اكوپياننان باسىم ءتۇستى.

دانابەك بايعازى، قىتاي

اسا اۋىر سالماقتا باق سىنايتىن قازاق بوكسشىسى قىتاي بىرىنشىلىگىندە كوزگە تۇسكەن. تاشكەنتتەگى الەم بىرىنشىلىگىندە ول العاشقى كەزدەسۋىن وتكىزىپ، جەڭىسكە جەتتى.

دانابەك حورۆاتيالىق بوكسش لۋكا پراتياچيچتى ۇتقان. بۇگىن قىتايداعى قازاق بوكسشىسى الەم چەمپيوناتىنىك كۇمىس جۇلدەگەرى، ارمەنيالىق داۆيد چالويانمەن جۇدىرىقتاسادى.

بەكنۇر قالي، موڭعوليا

موڭعوليانىڭ بايان-ولگەي ايماعىنان قازاق بوكسشىلارىن ءجيى كەزدەستىرۋگە بولادى. سولاردىڭ ءبىرى - 92 كەلىدە باق سىنايتىن بەكنۇر قالي. بەكنۇر وزبەكستانداعى الەم چەمپيوناتىنا قاتىساتىن بوكسشىلار قاتارىندا بولعان. ءبىراق جاراقاتىنا بايلانىستى شارشى الاڭعا شىققان جوق.

اۆتور: كوركەم ءالي

bassport.kz