توقايەۆ تاجىكستاننىڭ ارالدى قۇتقارۋ قورىنداعى ءتوراعالىق قىزمەتىنە جوعارى باعا بەردى
مەملەكەت باسشىسى قاسىم-جومارت تاجىكستان پرەزيدەنتى ەمومالي راحمونمەن بىرلەسكەن مالىمدەمەسىندە وسىنداي ۇستانىمىن ايتتى، دەپ حابارلايدى قازاقپارات ءتىلشىسى.
«بۇكىل ءوڭىردىڭ ءومىرى ءۇشىن ماڭىزدى بولىپ وتىرعان سۋ تاقىرىبى جاعىمدى راۋىشتە قارالدى. ورتالىق ازيانىڭ سۋ رەسۋرستارىن، ترانسشەكارالىق وزەندەردى پايدالانۋ تاسىلدەرىمىزدىڭ ۇقساس ەكەنىن، سونداي-اق، كونسترۋكتيۆتى ارىپتەستىكتى نىعايتىپ، ءوزارا قولايلى شەشىمدەردى ىزدەۋ قاجەتتىگىن تاعى ءبىر ناقتىلادىق. بۇل ماسەلەدە ارالدى قۇتقارۋ قورىنا ەرەكشە ءرول ارتىلىپ وتىر. قازاقستان تاجىكستاننىڭ وسى قوردا ءتوراعالىق ەتۋىن جوعارى باعالايدى»، - دەگەن مەملەكەت باسشىسى تاجىك تاراپىنا دۋشانبەدەگى قىركۇيەكتە وتەتىن ارالدى قۇتقارۋ حالىقارالىق قورىنىڭ ءسامميتىن ءساتتى وتكىزۋىنە تىلەكتەستىك ءبىلدىردى.
«ءوز تاراپىمنان تاجىك تاراپىنا ازياداعى ءوزارا ىقپالداستىق جانە سەنىم شارالارى جونىندەگى كەڭەستى قالتقىسىز قولداپ كەلە جاتقانى ءۇشىن العىس ايتتىم»، - دەدى قاسىم-جومارت توقايەۆ.
ايتا كەتەيىك، كەشە پرەزيدەنت قاسىم-جومارت توقايەۆ قازاقستانعا مەملەكەتتىك ساپارمەن كەلگەن تاجىكستان پرەزيدەنتى ەمومالي راحموندى ەلوردا اۋەجايىندا قارسى العان بولاتىن.
بۇگىن تاجىكستان پرەزيدەنتى ەمومالي راحمونوۆ مەملەكەت باسشىسى قاسىم-جومارت توقايەۆپەن اقوردادا وتكەن كەڭەيتىلگەن قۇرامداعى كەلىسسوز كەزىندە بيىل قازاقستان تاجىكستاننىڭ نەگىزگى ساۋدا سەرىكتەسىنە اينالۋى مۇمكىن ەكەنىن ايتتى.
