اداي كۇيىن كۇمبىرلەتكەن استراحاندىقتار اتىراۋ وبلىسىنا چەللەندج جولدادى
رەسەيلىك دومبىراشىلار قۇرمانعازى كەسەنەسىنىڭ الدىندا كومپوزيتوردىڭ «اداي» كۇيىن ورىنداعان. ولاردىڭ اراسىندا ەرەسەكتەر دە، بالالار دا بار.
«بيىل قازاقتىڭ ۇلى كومپوزيتورى، كۇيشى، دومبىراشى قۇرمانعازى ساعىرباي ۇلىنىڭ مەرەيتويىن اتاپ وتەمىز. وسىعان وراي، ءبىز - استراحان وبلىسىنىڭ دومبىراشىلارى اتىراۋ وبلىسىنا چەللەندج جولدايمىز»، - دەيدى قۇرمانعازى اتىنداعى وڭىرلىك مادەني ورتالىعىنىڭ ديرەكتورى امانگەلدى ابىلعازيەۆ.
قازاق جەرىندە كىندىك قانى تامعان ۇلى كۇيشى رەسەي فەدەراتسياسىنداعى التىنجار اۋىلىندا جەرلەنگەن. بۇل اۋىل استراحان وبلىسىنىڭ ۆولودار اۋدانىندا ورنالاسقان.
«التىنجار اۋىلىندا 2005 -جىلى قۇرمانعازى اتىنداعى وڭىرلىك مادەني ورتالىق اشىلدى. قازىر اتالعان ورتالىق استراحان وبلىسىنداعى ماڭىزدى مادەني جانە تانىمال تۋريستىك نىسانداردىڭ بىرىنە اينالدى. ءبىزدىڭ ورتالىققا الىس-جاقىن شەتەلدەردەن جىل سايىن مىڭعا جۋىق ادام كەلەدى. تۋريستەرگە قۇرمانعازى ساعىرباي ۇلىنىڭ، ونىمەن زامانداس بولعان قازاقتاردىڭ ءومىرى تۋرالى ماعلۇمات بەرەمىز. ورتالىقتا ۇلى كۇيشىنىڭ شىعارماشىلىعى، ءومىرى تۋرالى سىر شەرتەتىن ەكسپوناتتار قويىلعان مۋزەي مەن تۋريستەر ءۇشىن قوناق ءۇي جۇمىس ىستەپ تۇر. مۇندا سامال» قازاق مۋزىكالىق انسامبلى مەن «بەلىي گورود» ورىس مۋزىكالىق انسامبلىندە 40 قا جۋىق ادام جۇمىس ىستەيدى. دەنى - قانداستارىمىز، اراسىندا 25 دومبىراشى بار»، - دەيدى امانگەلدى ابىلعازيەۆ.
ەسكە سالا كەتەلىك، بۇعان دەيىن اتىراۋ وبلىسى مەن رەسەي اراسىنداعى ساۋدا اينالىمى 30 ميلليون ا ق ش دوللارىنا جۋىقتاعانىن جازعان ەدىك.
