بيىل قازاقستان تاجىكستاننىڭ نەگىزگى ساۋدا سەرىكتەسىنە اينالۋى مۇمكىن - ەمومالي راحمون
«ديپلوماتيالىق قاتىناستاردىڭ وتىز جىلىندا ارىپتەستىكتىڭ بارلىق سالالارىندا ەلەۋلى جەتىستىككە جەتكەنىمىز قۋانتادى. بۇل پروتسەستىڭ دامۋىنا ەكى ارادا ۇنەمى ءجۇرىپ جاتقان ساياسي ديالوگ ءسوزسىز ىقپال ەتەدى. بۇل ارالىقتا مەملەكەتارالىق ءوزارا اركەتتەستىك قاتىناستىڭ قاجەتتى تەتىكتەرى مەن سالماقتى قۇقىقتىق بازاسى قالىپتاستى. بۇگىن سول بازانى جاڭا قۇجاتتارمەن تولىقتىرامىز»، - دەدى تاجىكستان باسشىسى.
سونداي- اق، ەمومولي راحمون ەكى اراداعى ساۋدا- ەكونوميكالىق ارىپتەستىككە توقتالدى.
«قازاقستان تاجىكستاننىڭ سىرتقى ساۋدا قۇرىلىمىندا تالايدان بەرى جەتەكشى ورىندى ۇستاپ تۇر. ءسىزدىڭ تاجىكستانعا جاساعان رەسمي ساپارىڭىز كەزىندە وزىڭىزبەن جىل سايىنعى تاۋار اينالىمىنىڭ كولەمىن 2 ميلليارد دوللارعا دەيىن جەتكىزۋگە كەلىسكەن بولاتىنبىز. سول اتالعان مىندەتتەر جوسپارعا ساي ىسكە اسىپ جاتقانى قۋانتادى. قازاقستان بۇگىندە تاجىكستاننىڭ ساۋدا سەرىكتەستەرىنىڭ اراسىندا ەكىنشى ورىندا تۇر. 2023 -جىلدىڭ قورىتىندىسى بويىنشا وسى كورسەتكىش بويىنشا ءبىرىنشى ورىنعا شىعۋى مۇمكىن. وعان وراسان مۇمكىندىكتەر بار»، - دەدى تاجىكستان پرەزيدەنتى.
سونداي- اق، ول شاعىن قۇرامداعى كەلىسسوزدىڭ ناتيجەلى بولعانىن جانە بىرلەسكەن جوبالاردى جۇزەگە اسىرۋ ماڭىزدى ەكەنىن اتاپ ءوتتى.
«تاجىكستان مەن قازاقستان - ستراتەگيالىق ارىپتەستەر، ءبىزدىڭ قارىم- قاتىناستارىمىز تۇراقتى تۇردە دامىپ كەلەدى. ءبىز ونى ودان ءارى نىعايتۋعا زور ءمان بەرەمىز. قازاقستان بۇگىندە باستى ساۋدا سەرىكتەستەرىمىزدىڭ اراسىندا ەكىنشى ورىندا. بىلتىرعى تاۋار اينالىمىنىڭ ءوسىمى 20 پايىزدان استى. ءبىز باسقا سالالاردا دا قارقىندى ديالوگ جۇرگىزەمىز. سىزبەن ەلدەرىمىزدىڭ الەۋمەتتىك- ەكونوميكالىق دامۋ پەرسپەكتيۆالارىن، سونداي- اق حالىقارالىق جانە وڭىرلىك ماسەلەلەردى تالقىلاۋعا دايىنمىن. ءسىزدى جانە بارشا قازاقستان حالقىن پارلامەنت سايلاۋىنىڭ ءساتتى وتۋىمەن قۇتتىقتايمىن. سىزگە الداعى ۋاقىتتا باۋىرلاس قازاقستاننىڭ دامۋىنا باعىتتالعان رەفورمالاردى جۇزەگە اسىرۋدا تابىس تىلەيمىن. ءبىز تۇراقتى بايلانىستار مەن جوعارى دەڭگەيدەگى ۇزاقمەرزىمدى ساياسي ديالوگتىڭ يگى داستۇرلەرىن ساقتاپ، ودان ءارى كەڭەيتەمىز. مەن دوستىق قارىم- قاتىناسىمىزدى باعالايمىن»، - دەدى تاجىكستان پرەزيدەنتى.
كەشە پرەزيدەنت قاسىم- جومارت توقايەۆ قازاقستانعا مەملەكەتتىك ساپارمەن كەلگەن تاجىكستان پرەزيدەنتى ەمومالي راحموندى ەلوردا اۋەجايىندا قارسى العان بولاتىن.
كەلىسسوز بارىسىندا قازاق- تاجىك ىنتىماقتاستىعىن ودان ءارى دامىتۋ پەرسپەكتيۆالارى تالقىلاندى. سونداي- اق، ساۋدا- ەكونوميكالىق، سونىڭ ىشىندە ونەركاسىپ، اۋىل شارۋاشىلىعى جانە كولىك سالالارىنداعى ىنتىماقتاستىقتى كەڭەيتۋگە ەرەكشە نازار اۋدارىلدى.
