استانا دارىگەرلەرى شاشىن «جەۋدى» ادەتكە اينالدىرعان بالانىڭ اسقازانىنان ءبىر ۋىس شاش الدى
شاشتى ىسىك - قورىتىلمايتىن-سىڭىرىلمەيتىن شاش ماسساسىنىڭ اسقازان-ىشەك جولىندا جينالۋىنىڭ ناتيجەسى، سودان ىشتە كەدەرگى پايدا بولادى.
راپۋنتسەل ەرتەگىلەرىنىڭ ۇزىن شاشتى كەيىپكەرىنىڭ ەسىمىمەن اتالعان «شاش جۇتۋ» سيندرومى - وتە سيرەك كەزدەسەتىن سىرقات.
«بۇل اۋرۋ وتە سيرەك كەزدەسەدى. اسقازاندا جينالعان شاتاسقان شاشتىڭ كوپ مولشەرى تريحوبەزوار نەمەسە «شاشتى ىسىك» پايدا بولۋىنا اكەلىپ سوعادى، اسقازاندى بىرتە-بىرتە «جاۋىپ-بىتەپ» ، ونىڭ جۇمىسىنا كەدەرگى كەلتىرەدى. مۇنداي ىسىك ۇزىن قۇيرىقتى اسقازاننىڭ پىشىنىنە كەلەدى، اش ىشەككە دەيىن جەتەدى. عىلىمي مالىمەتتەرگە سۇيەنسەك، راپۋنتسەل سيندرومى بار ناۋقاستاردىڭ جەتپىس پايىزى - جيىرما جاسقا تولماعان قىزدار»، - دەپ ءتۇسىندىردى №2-كوپسالالى قالالىق بالالار اۋرۋحاناسى جوسپارلى حيرۋرگيا ءبولىمىنىڭ مەڭگەرۋشىسى ازامات ورازالينوۆ.
اۋرۋحاناعا تۇسكەن بالانىڭ اتا-اناسى الدىمەن ءوز ەمحاناسىنا جۇگىنگەن، وندا فگدس ارقىلى تەكسەرۋ جۇرگىزگەن.
«ءبىز اتىراۋ وبلىسىنان كەلدىك. بالا 15 جاستا، وقۋ جىلى اياقتالعانشا استانادا تۇرىپ جاتىرمىز. № 2-ەمحانادا تىركەۋدەمىز. بالا مەزگىل- مەزگىل ءىشى اۋىرىپ، تاماق ىشكەننەن كەيىن قۇساتىن. تەكسەرۋ كەزىندە اسقازانىندا تريحوبەزوار انىقتالدى. سودان №2-كوپسالالى قالالىق بالالار اۋرۋحاناسىنا جولداما بەرىپ، پورتالعا قويدى. م ءا م س جۇيەسىنىڭ ارقاسىندا قىسقا مەرزىمدە اۋرۋحاناعا جاتقىزىپ، وتا جاسادى. بالا ءقازىر ءوزىن جاقسى سەزىنەدى، سول ءۇشىن بارىنە راحمەت»، - دەيدى اجەسى سۆەتا.
دارىگەردىڭ ايتۋىنشا، ۇلدارعا قاراعاندا قىزدار راپۋنسەل سيندرومىنا ءجيى ۇشىرايدى.
ايەلدەردىڭ شاشى ادەتتە ەركەكتەرگە قاراعاندا ۇزىن، سوندىقتان اسقازاننىڭ شىرىشتى قاباتىندا قالىپ قويۋ ىقتيمالدىعى جوعارى.
بالا شاشتى جۇتقان كەزدە ىسىك كولەمى ۇلعايادى جانە ول قورىتىلمايتىن-سىڭىرىلمەيتىن شاش جيىنتىعىنا اينالادى.
«پاتسيەنتتەردە تريحوفاگيا بەلگىلەرىنىڭ پايدا بولۋىن، ياعني ولاردىڭ نەگە شاش جەيتىنىن تۇسىندىرەتىن كوپتەگەن تەوريالار بار. مىسالى، سترەسسكە قارسى قۇرال سەكىلدى، ۇنەمى دۇرىس تاماقتانباۋ نەمەسە سالت-ءداستۇردىڭ اسەرى رەتىندەگى بالالىق نەگاتيۆيزم. تريحوفاگيا جانە پيكاتسيزم (تابەتتىڭ بۇزىلۋى جانە جەۋگە جارامسىز زاتتاردى جەگىسى كەلەتىن باقىلاۋعا كونبەيتىن ادەت - «قاجەتتىلىك») اعزاسىندا تەمىر جەتىسپەيتىن ادامداردا كەزدەسەدى. راپۋنسەل سيندرومىنىڭ كەيبىر عىلىمي سيپاتتاعان جاعدايلارىندا پاتسيەنت قۇرامىندا تەمىر بار پرەپاراتتاردى قابىلداعاننان نەمەسە سەلياكيا سىرقاتىنان ەمدەلگەننەن كەيىن شاش جۇلۋدى جانە جەۋدى قويادى. بۇل اۋرۋدىڭ ىقتيمال سەبەپتەرىن جوققا شىعارعان كەزدە مىندەتتى تۇردە پسيحولوگتىڭ كەشەندى كومەگى قاجەت. وكىنىشكە قاراي، كوپ جاعدايدا حيرۋرگيالىق ءادىس شاشتى ىسىكتى ءبىر رەت قانا قالپىنا كەلتىرەتىن جانە اسقازان-ىشەك جولدارى قالپىنا كەلتىرەتىن جالعىز ءتيىمدى ءادىسى بولىپ قالا بەرەدى. بالاعا ءبىزدىڭ اۋرۋحانادا جوسپارلانعان حيرۋرگيا بولىمىندە وتا (لاپاروتوميا، گاستروتوميا، اسقازاننىڭ تريحوبەزواراسىن الىپ تاستاۋ) جاسالدى. وتانى استانا قالاسىنىڭ باس شتاتتان تىس بالالار حيرۋرگى رينات بايگەرەيەۆ جاسادى. وتا م ءا م س جۇيەسى بويىنشا جۇرگىزىلدى. قازىرگى ۋاقىتتا بالا دارىگەرلەر باقىلاۋىندا»، - دەپ قورىتىندىلادى №2-كوپسالالى قالالىق بالالار اۋرۋحاناسىنىڭ جوسپارلى حيرۋرگيا ءبولىمىنىڭ مەڭگەرۋشىسى ازامات ورازالينوۆ.
