بىرەۋ اقشاڭىزدى شەشىپ الماقشى: پەتروپاۆل تۇرعىنى الاياقتىقتىڭ جاڭا تۇرىنەن زارداپ شەكتى
سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بۇل جولى الاياقتاردىڭ قۇرىعىنا 33 جاستاعى ايەل تۇسكەن.
كەلىنشەك باسقالارعا ەسكەرتۋ ءۇشىن ءوزىنىڭ قالاي الدانىپ قالعانىن ايتىپ بەردى.
«بانكتەن» قوڭىراۋ سوقتى. ماعان بانك كارتاسىنا تىركەلگەن تەلەفون ءنومىرىمدى بىرەۋلەردىڭ اۋىستىرايىن دەپ جاتقانىن ايتتى. كەيىن الاياقتاردىڭ مەنىڭ شوتىما كىرۋگە تىرىسىپ جاتقانىنا، «قورعانىس ورناتۋ» قاجەتتىگىنە سەندىردى»، - دەيدى قالا تۇرعىنى.
ايەلدى WhatsApp مەسسەندجەرى ارقىلى «روبوت-چاتقا» قوسقان.
الاياق وعان ءوز دەرەكتەرىن داۋىستاپ اتاۋدىڭ قاجەتى جوق ەكەنىن، تەك «روبوت- چاتقا» كارتا ءنومىرىن، قورعانىس ورناتۋ قاجەت سومانى جانە سىرتقى بەتىندەگى ءۇش تسيفردى ەنگىزۋدى سۇراعان.
«ماعان مەنەدجەر كودىن كورسەتىڭىز دەدى. مەن مەنەدجەردىڭ كودىن بىلمەيمىن، مەنىڭ مەنەدجەرىم كىم بولدى دەپ سۇرادىم. ول «كارتانى اۋدارىڭىز، ارتقى جاعىندا ءۇش سان بولۋى كەرەك، بۇل ءسىزدىڭ مەنەدجەرىڭىزدىڭ ءنومىرى، ونى دا داۋىستاپ ايتپاي، جازىپ جىبەرىڭىز» دەدى. مەن وعان سەنىپ، ايتقانىن ورىندادىم»، - دەيدى ايەل.
بۇدان كەيىن الاياق دەرەكتەردى راستاۋ ءۇشىن ايەلگە sms ارقىلى كەلگەن كودتى ەنگىزۋدى سۇراعان.
بۇل كليەنتتىڭ قارجىسىنا تولىق قول جەتكىزۋگە مۇمكىندىك بەرەتىن ءبىر رەتتىك قۇپيا ءسوز ەدى.
كوپ ۇزاماي ونىڭ شوتىنداعى بار سوما جوعالىپ كەتتى. شىعىن 113 مىڭ تەڭگەنى قۇرادى.
«بۇل فاكت ق ر قىلمىستىق كودەكسىنىڭ 190-بابى «الاياقتىق» بويىنشا سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىندە تىركەلدى. «بانكتەن قوڭىراۋ» شالىنعان كەزدە اڭگىمەنى دەرەۋ دوعارۋدى سۇرايمىز. ەگەر قاراجاتىڭىزدىڭ ساقتالۋىنا قاتىستى كۇمان پايدا بولسا، بانككە قايتا قوڭىراۋ شالىڭىز نەمەسە بانك بولىمشەسىنە كەلىڭىز. قۇپيا دەرەكتەرىڭىزدى ەشكىمگە سەنىپ ايتپاڭىز جانە بوگدە ادامداردىڭ قىسىمىمەن اقشا اۋدارىمدارىن جاساماڭىز»، - دەيدى س ق و پ د كريمينالدىق پوليتسيا باسقارماسىنىڭ باستىعى مارات جۇماليەۆ.
