قانشا قازاقستاندىق ءوزىن بانكروت دەپ جاريالاۋ تۋرالى ءوتىنىش بەردى
بۇل تۋرالى قارجى مينيسترلىگى مەملەكەتتىك كىرىستەر كوميتەتى بەرەشەكپەن جانە دارمەنسىز بورىشكەرلەرمەن جۇمىس باسقارماسى باسشىسىنىڭ ورىنباسارى مەرۋەرت سيسەمبايەۆا ءمالىم ەتتى، دەپ حابارلايدى قازاقپارات ءتىلشىسى.
«3- ناۋرىزدان باستاپ ەلىمىزدە ازاماتتاردىڭ ءوزىن بانكروت دەپ جاريالاۋعا ءوتىنىش قابىلدانا باستادى. بۇگىنگى جاعداي بويىنشا 49113 ازامات بانكروت مارتەبەسىن الۋعا ءوتىنىش بەردى. وتىنىشتەر قارالىپ جاتىر، دەگەنمەن باسىم بولىگى بويىنشا باس تارتىلىپ جاتىر. ستاتيستيكاعا سۇيەنسەك، 36 مىڭعا جۋىق ازاماتتىڭ ءوتىنىشى كەرى قايتارىلدى. ال 6058 كليەنتتىڭ سوتسىز بانكروت اتانۋ ءوتىنىشى راسىمدەلدى»، - دەدى مەرۋەرت سيسەمبايەۆا مەملەكەتتىك كىرىستەر كوميتەتىنىڭ Instagram پاراقشاسىندا وتكەن تىكەلەي ەفير بارىسىندا.
ونىڭ ايتۋىنشا، ءوتىنىش 15 جۇمىس كۇنى ىشىندە قارالادى. وعان قۇزىرلى مەملەكەتتىك ورگاندار جانە كىرىستەر كوميتەتى جاۋاپتى.
«بانكروت اتانۋعا نيەت بىلدىرگەندەر قويىلاتىن تالاپتاردىڭ ءبىرى سوڭعى 12 اي ىشىندە تولەم بويىنشا بەرەشەگى بولماۋى ءتيىس. جوعارىدا ايتقانىمداي، 36 ازاماتتىڭ ءوتىنىشى قاناعاتتاندىرىلمادى، سونىڭ ىشىندە %55 دا بەرەشەگى بار بولىپ شىقتى، سوندىقتان دا باس تارتىلدى. وسى ورايدا كليەنتتەر بانكروت اتانۋعا ءوتىنىش بەرەر الدىندا قاجەتتى مالىمەتتەردى كرەديتتىك بيۋرودان الدىن الا ءبىلىپ السا دەيمىز»، - دەيدى ول.
بۇعان دەيىن قارجى مينيسترلىگى بانكروت مارتەبەسىن الۋعا بەرىلگەن ءوتىنىش قاناعاتتاندىرىلماي، باس تارتقان جاعدايدا ونىڭ سەبەپتەرىن جويۋ ءۇشىن قۇزىرلى مەملەكەتتىك ورگاندارعا جۇگىنۋگە بولاتىنىن حابارلاعان ەدى.
ەسكە سالايىق، بيىل 3- ناۋرىزدا ەلىمىزدە بانكروتتىققا ءوتىنىم قابىلداۋ باستالدى. اتالعان پروتسەسس تۋرالى تولىعىراق وسى سىلتەمە ارقىلى تانىسۋعا بولادى.
