اۆتونەسيە باعدارلاماسىنا قانداي وزگەرىستەر ەنگىزىلەدى

استانا. قازاقپارات - كولىك الۋعا بەرىلەتىنە جەڭىلدەتىلگەن نەسيە باعدارلاماسىنا وزگەرىستەر ەنگىزىلىپ جاتىر.

ونىڭ قورىتىندىسى 15-مامىرعا دەيىن جاريالانادى. بۇل تۋرالى يندۋستريا جانە ينفراقۇرىلىمدىق دامۋ ءمينيسترى مارات قارابايەۆ Jibek joly تەلەارناسىنىڭ ماجىلىستەگى موبيلدى ستۋدياسىندا بەرگەن سۇحباتىندا ءمالىم ەتتى، دەپ حابارلايدى قازاقپارات ءتىلشىسى.

«جەڭىلدەتىلگەن اۆتونەسيەگە قاتىستى وزگەرىستەر ءتورت بولىكتەن تۇرادى. بۇعان دەيىن ب ا ق وكىلدەرى اۆتونەسيە العان ازاماتتاردىڭ اتى-ءجونى نەگە جاريالانبايتىنىن سۇراعان ەدى. وسى ورايدا، العاشقى وزگەرىس - ەندى سايتتا اۆتونەسيە العان ازاماتتاردىڭ اتى-ءجونى جاريالانادى. ارينە، كليەنتتىڭ رۇقساتى ارقىلى. ەكىنشى وزگەرىس، قىمبات كولىك ساتىپ الۋعا شاماسى جەتەتىن اۆتونەسيە الۋشىلارعا قاتىستى. مىسالى، 10 ميلليون تەڭگە نەسيە بەرىلەدى، ءبىراق كليەنت 15 ميلليون تەڭگەنىڭ كولىگىن العىسى كەلەدى، دەمەك قالعان 5 ميلليوندى ءوز قالتاسىنان تولەيدى. وسى شارتتى وزگەرتكىمىز كەلىپ وتىر. قىمبات كولىكتەردىڭ ورنىنا سۇرانىسقا يە، حالىقتىڭ قالتاسى كوتەرە الاتىن اۆتوموبيل ماركالارىن قاتىستىرۋ»، - دەدى مارات قارابايەۆ سۇحبات بارىسىندا.

ءمينيستردىڭ ايتۋىنشا، كەلەسى وزگەرىس جالاقىعا قاتىستى.

«بەلگىلى ءبىر مولشەردەن ارتىق جالاقى الاتىن ازاماتتارعا اۆتونەسيە بەرمەۋ. ونىڭ ورنىنا جەڭىلدەتىلگەن نەسيەنى ايلىعى شەكتەن اسپايتىن كليەنتتەرگە بەرۋدى ءجون دەپ وتىرمىز. بۇل شارا حالىق ءۇشىن ءتيىمدى ەتۋ ماقساتىندا قولعا الىنىپ وتىر. ەندى شەكتى جالاقى كولەمىنە كەلسەك، ءبىز وپەراتورعا تالداۋ جۇرگىزۋدى تاپسىردىق. ايتار بولساق، قازاقستاندىقتار نەگىزىنەن قانداي كولىكتەردى ءجيى الادى؟ ول كولىكتەردىڭ باعاسى قانشا جانە ونى ساتىپ العان ازاماتتاردىڭ جالاقىسى قانداي؟ تالداۋ ءجۇرىپ جاتىر، سوندىقتان ءدال قازىر ەسەپ دايىن ەمەس. ءبىراق، تالداۋدىڭ ناتيجەسى 15-مامىرعا دەيىن جاريالانادى»، - دەيدى ول.

سونداي-اق، ۆەدومستۆو باسشىسى بۇگىندە قورعا 4 ميلليارد تەڭگە جينالعانىن، سوما 5 ميلليارد تەڭگەگە جەتكەندە اۆتونەسيە باعدارلاماسى قايتا ىسكە قوسىلاتىنى تۋرالى ايتتى.

«نەسيەگە ءوتىنىم بەرۋدى ونلاين ەتكەن سەبەبىمىز - ادامدار ەكىنشى دەڭگەيلى بانكتەرگە بارىپ كەزەككە تۇردى. سودان سوڭ حالىق اراسىندا سول كەزەكتىڭ قانشالىقتى ءادىل ءوتىپ جاتقانىنا كۇمان تۋدى. كۇماندى جويۋ ءۇشىن ءبىز ونلاين جۇيەگە كوشىردىك، ول جەردە ادام فاكتورى مۇلدەم جوق»، - دەپ تولىقتىردى م. قارابايەۆ.

ودان بولەك، مينيستر حالىق سۇرانىسىنا قاراي الداعى ۋاقىتتا اۆتونەسيە باعدارلاماسىنا تاعى دا وزگەرىستەر ەنگىزىلۋى مۇمكىن ەكەنىن تىلگە تيەك ەتتى.