تاجىكستان قازاق بيزنەسمەندەرىنە تابىس تابۋعا مول مۇمكىندىك بەرەدى - سەرىك جۇمانعارين

استانا. قازاقپارات - تاجىكستان قازاق بيزنەسمەندەرىنە تابىس تابۋعا مول مۇمكىندىك بەرەدى. بۇل تۋرالى پرەمەر- ءمينيستردىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين ايتتى، دەپ حابارلايدى قازاقپارات ءتىلشىسى.

ونىڭ دەرەگىنشە، بۇگىندە قازاقستاندا تاجىكستانمەن بىرلەسكەن 418 كاسىپورىن جۇمىس ىستەپ تۇر. ونىڭ 416-سى شاعىن بيزنەس سانالادى.

«تاجىكستان شاعىن بيزنەسكە وتە جاقسى مۇمكىندىكتەر ۇسىنادى. قازىر ماۋسىمارالىق كەزەڭ جانە بىزگە جەمىس- كوكونىس ونىمدەرى جەتىسپەيدى. ال، تاجىكستاندا ءونىم جيناۋ باستالدى. بيزنەس وسى مۇمكىندىكتى پايدالانا الار ەدى. بيزنەس جۇرگىزۋ تۇرعىسىندا تاجىكستاندا دا، قازاقستاندا دا ەشقانداي تاۋەكەل جوق. زاڭناما قالىپتاسقان، ينۆەستيتسيالىق قورعاۋ بار. ەلدەر اراسىندا تولەم دە ەركىن جۇرەدى. سوندىقتان دا، جۇمىس ىستەۋ ءۇشىن مول مۇمكىندىك بار»، - دەدى سەرىك جۇمانعارين بيزنەس فورۋم اياسىندا باق وكىلدەرىنە بەرگەن سۇحباتىندا.

ونىڭ اتاپ وتۋىنشە، تاجىكستان قازاقستان ونىمدەرىن شىعارۋ ءۇشىن دە ۇلكەن نارىق سانالادى. بۇل رەتتە، ەڭ الدىمەن اگرارلىق ونىمدەردى جەتكىزۋگە مۇمكىندىك بار. بيىل بۇل ەلگە بيداي، ارپا جانە كۇنباعىس مايى كوپ جەتكىزىلدى. وتاندىق وندىرۋشىلەردىڭ ارقاسىندا تەك تاجىكستانعا عانا كۇنباعىس مايىنىڭ ەكسپورتى 20 ميلليون دوللارعا جۋىقتادى.

«بار ءونىمدى ءوزارا جەتكىزۋگە مۇمكىندىك بار. ال، ول ونىمدەرمەن اينالىسۋ ءۇشىن شاعىن كاسىپورىن بولسا جەتكىلىكتى. كۇردەلى ليتسەنزيا الۋدىڭ ەشقانداي قاجەتتىلىگى جوق. وسى تۇرعىدا تاجىكستان، جالپى ورتالىق ازيا ەلدەرى قازاقستاننىڭ شاعىن جانە ورتا بيزنەسمەندەرى ءۇشىن مول مۇمكىندىك اشادى. تابىس تابۋ ءۇشىن باعاسى دا جاقسى»، - دەدى ۆيتسە- پرەمەر.