جيگۋلي دايرابايەۆ جەلىدە وزىنە قاتىستى تاراعان ايىپتاۋلارعا جاۋاپ بەردى

استانا. قازاقپارات - ءماجىلىس دەپۋتاتى جيگۋلي دايرابايەۆ اۋىلداستارىنىڭ جەلىدە جاريالاعان ايىپتاۋلارىنا جاۋاپ بەردى.

ولار جامبىل وبلىسىنىڭ مەركە اۋىلىنداعى ءۇيى مەن كەڭەس اۋىلىنداعى جەرگە قاتىستى جازعان بولاتىن، دەپ حابارلايدى قازاقپارات.

«جالپى، كەز كەلگەن ادام قۇندى زات ساتىپ العاندا جەتى رەت ولشەپ بارىپ شەشىم قابىلدايدى. وتباسىما دەپ ساتىپ العان ءۇي ۋاقىت وتكەن سوڭ زاڭسىز دەپ ەسەپتەلگەنى كىمگە كەرەك؟ مۇنداي تاۋەكەل ەشكىمگە دە قاجەت ەمەس. وزدەرىڭىزگە وسى ءبىر سۇراقتى قويىپ كورسەڭىز، بىردەن تۇسىنەسىزدەر دەپ ويلايمىن. نوتاريۋس ارقىلى جاسالعان كەلىسىمشارتىمىز زاڭدى، ءۇي يەلەرىنىڭ قۇقىقتارى ساقتالعان. اقشا تالاپ ەتىپ جۇرگەن ازاماتتى تانىمايمىن دا. بىلۋىمشە، ول - ءۇي ساتقان ايەلدىڭ بۇرىنعى جۇبايى (اجىراسقان). ەرلى-زايىپتىلاردىڭ اراسىنا كىرىسەتىن ادام ەمەسپىن. ول ازامات مەنىڭ وسى لاۋازىمىمدى پايدالانىپ، بوپسالاۋ جولىن تاڭداعان. ايتا كەتەيىن، مۇنداي ارەكەت ءبىرىنشى رەت ەمەس. وسىدان ءبىراز ۋاقىت بۇرىن مەنى كىنالاعان ادام قارالاعانى ءۇشىن سوتتىڭ شەشىمىمەن جازالانىپ، ايىپپۇل تولەگەن بولاتىن. بۇل ارەكەتىن توقتاتپاسا قايتادان سوتقا جۇگىنۋىمە تۋرا كەلەدى»، - دەپ جازادى دەپۋتات مەركەدەگى ءۇيى تۋرالى.

ال، كەڭەس اۋىلىنداعى جەرگە قاتىستى جاعدايدىڭ 20 جىل بۇرىن بولعانىن ايتادى.

«جەرگە قاتىستى كومپانيانىڭ يەلەرى - اعايىندى يەمبەرديەۆتەر (ەرلان مەن نۇرلان ەرگەشباي ۇلدارى). ولار قازىر قازاقستاندا. شاتاسپاسام، الماتىدا تۇرادى. جەردىڭ دە، اقشانىڭ دا يەسى وسىلار. مەنىڭ بۇل ىسكە ەشقانداي قاتىسىم جوق. كەزىندە مەن تەك جالدامالى قىزمەتكەر بولدىم. مەركى اۋدانىندا 1 مەتر دە جەرىم جوق. سوندىقتان دا، اۋىلداعى نارازى ادامداردىڭ ارىزدارى جەر يەلەرى يەمبەرديەۆتەرگە جولدانۋى ءتيىس دەپ ەسەپتەيمىن. اۋىل تۇرعىندارى مەنى نەگىزسىز كىنالاماي، قايتا كومەگىمە جۇگىنگەنى دۇرىس ەدى. ءالى دە كەش ەمەس»، - دەيدى جيگۋلي دايرابايەۆ.