ميانمادا قۇلدىقتان قاشىپ شىققان قازاقستان ازاماتتارى ەلگە جەتكىزىلەدى
«كەيىنگى كەزدەرى ميانما مەن تايلاندتىڭ اراسىندا ورنالاسقان «التىن ءۇشبۇرىش» دەگەن اۋماقتا قازاقستان ازاماتتارى جۇمىس قۇلدىعىنا ءتۇسىپ جاتىر. وسىعان دەيىن ەسكەرتۋ ايتىپ، اقپارات تاراتساق تا، ازاماتتارىمىز سول جەرگە بارىپ جاتىر. كەيىنگى اقپارات بويىنشا سول جەردە بەس ادام انىقتالدى»، - دەدى ا. سمادياروۆ ەلوردادا وتكەن باسپا ءسوز ءماسليحاتىندا.
ونىڭ ايتۋىنشا، بيىل ءساۋىر ايىنىڭ ورتا كەزىندە ءبىر ادام قازاقستاننىڭ تايلاندتاعى كونسۋلىنا حابارلاسىپ، بەس ادام ميانمادا قۇلدىقتا وتىرعانى تۋرالى ايتقان. ولار اتالعان كومپانيانىڭ جۇمىسىنا ءوز ەركىمەن بارعان.
«وسىنداي جاعدايدا بىرنەشە ادامدى قۇتقارعان كونسۋلدىڭ ءتيىستى تاجىريبەسى بار. وسى ورايدا ول اتالعان ادامدارعا قۇلدىقتان بوساپ شىعۋ تاسىلدەرىنە قاتىستى كەڭەس بەرگەن. ءبىزدىڭ ازاماتتاردى ۇستاپ وتىرعان كومپانيا ەكى ەل شەكاراسىنىڭ ماڭىندا ورنالاسقان. قازاق جىگىتتەرى سول جەردەگى وزەننەن ءوتىپ، تايلاندتىڭ اۋماعىنا قاشاتىن بولىپ كەلىسكەن. ءبىراق، قاشاتىن كۇنى جارتى ساعات بۇرىن عانا كونسۋلدى ەسكەرتكەن. ال، كونسۋل بانگكوكتان اتالعان شەكاراعا جەتۋ ءۇشىن اۆتوكولىكپەن 7 ساعاتتاي ءجۇرۋى كەرەك. قازاقستان ازاماتتارى كومپانيانىڭ اۋماعىنان شىققان بويدا، ولاردىڭ سوڭىنان كومپانيا وكىلدەرى قۋعىنعا تۇسكەن. بەسەۋىنىڭ تورتەۋى وزەننەن ءوتىپ ۇلگەرگەن، ال بىرەۋىن كومپانيا كۇزەتشىلەرى ۇستاپ العان»، - دەدى رەسمي وكىل.
ونىڭ سوزىنە قاراعاندا، تايلاندتىڭ اۋماعىنا جەتكەن ءتورت ادامعا قازاقستان كونسۋلى كومەكتەسىپ، ولار بانگكوككە جەتتى. 3-4 كۇندە قازاقستان ازاماتتارى ەلگە ورالادى.
«ميانمادا قالعان اداممەن ءبىر اپتادان بەرى بايلانىس جوق. سول كومپانيانىڭ باسشىلىعىنا جانە كۇزەتشىلەرىنە حابارلاسقان ەدىك. ولار بىزگە ناقتى جاۋاپتارىن بەرمەدى. قولدا بار اقپاراتقا سايكەس، ولار ءار ادامعا 6 ميلليون تەڭگە سۇراعان ەكەن. قازىر كەلىسسوزدەردى جالعاستىرىپ جاتىرمىز. كومپانيا وكىلدەرى جاۋاپ بەرسە، ول جىگىتتى الىپ شىعۋعا مۇمكىندىك بار»، - دەدى ا. سمادياروۆ.
بۇدان بۇرىن حابارلانعانداي، جىل باسىندا ميانمادا قۇلدىقتا بولعان قازاقستانىڭ ەكى ازاماتى ەلگە جەتكىزىلدى.
