ەلىمىزدە مۇگەدەكتىكتى راستاۋ جەڭىلدەي تۇسپەك

استانا. قازاقپارات - قازاقستاندا مۇگەدەك ەكەنىن راستاۋ پروتسەسى جەڭىلدەي تۇسپەك. ەندى قاعاز تاسىپ، مەكەمە ارالاۋدىڭ قاجەتى بولمايدى.

بۇل تۋرالى ورتالىق كوممۋنيكاتسيالىق قىزمەتى الاڭىندا وتكەن بريفينگ بارىسىندا ايتىلدى، دەپ حابارلايدى قازاقپارات ءتىلشىسى.

«ءبىز ەڭبەك جانە الەۋمەتتىك قورعاۋ مينيسترلىگىمەن بىرلەسىپ ەكى جىل بويى مۇگەدەكتىكتى سىرتتاي كۋالاندىرۋ بويىنشا پيلوتتىق جوبانى ىسكە اسىرىپ كەلەمىز. وسى جۇمىس اياسىندا ءبىز ارىپتەستەرىمىزبەن بىرگە مەديتسينالىق-الەۋمەتتىك ساراپتاما جۇرگىزىلەتىن ورگاندارعا قاعاز تۇرىندە ۇسىنىلۋى قاجەت ءبىرقاتار قۇجات سانىن قىسقارتتىق. بۇل باعىتتا الدىمەن پرواكتيۆتى رەجيمگە اۋىستىرىلاتىن نوزولوگيالاردىڭ ءتىزىمىن كەڭەيتەتىن بولامىز. ياعني مەديتسينالىق-الەۋمەتتىك ساراپتاما قۇرىلىمدارىنا تىكەلەي بارۋدىڭ قاجەتى بولمايدى. وسىلايشا مۇگەدەكتىكتى راستاۋ ءۇشىن جۇگىرىس ازايا تۇسپەك»، - دەدى دەنساۋلىق ساقتاۋ ۆيتسە-ءمينيسترى بەيبىت ەسەنبايەۆ.

ايتا كەتسەك، ەندى قازاقستاندىقتار رەتسەپت بويىنشا دارىلەردى QR كود ارقىلى الادى.

اتالعان قىزمەت ازىرگە پيلوت جوبا رەتىندە ەلوردا ەمحانالارىندا ىسكە قوسىلدى. جىل سوڭىنا دەيىن باسقا دا وڭىرلەردە ىسكە قوسۋ جوسپارلانىپ وتىر.

سونداي-اق، قازاقستاندىقتاردىڭ مەديتسينالىق اناليزدەردىڭ ناتيجەسىنە ونلاين قول جەتكىزە الاتىنى تۋرالى حابارلاعان ەدىك.